Shillong, Jylliew 02
Ka jingïalang kaba kyrpang kaba la long ha ka 17 tarik Jymmang 2026 ha Seng Khasi College Shillong ïa kaba la wan ïashimbynta da ka Seng Khasi Kmie, Sengbah ki Nongshat Nongkhein Hynñiewskum Hynñ-iewtrep, Seng Khihlang, Seiñraij Jowai, Seiñraij Niamtre Shillong, Seiñ Kyntu Seiñraij 12 Dolloi, Seiñraij Tuber, Seiñraij Raliang, Seiñraij Nar-tiang, Seiñraij Mynso bad kiwei de ki nongmihkhmat ki seng khasi Seiñraij kaba la pynskhem biang mynta ka sngi ka 2 tarik Jylliew ïa ka rai lada pyndap ha ki kot ïa ka kyrteng niam haba wan lum ïa ka khana samari (census 2027) ki dei ban thoh “Niamkhasi Niamtre”.
Haba ïakren bad ki nongthoh khubor mynta ka sngi ka 2 tarik Jylliew 2026 u Bah P.D Nong-rum uba dei u Vice-President ka Seng Khasi kmie u la kyntu ïa baroh kiba bat ïa ka niam tynrai lada wan kiba shim kyrteng ha khana samari ban pyndap ïa ka niam dei ban thoh beit “Niamkhasi Niamtre” namar ha kine ki snem ba la leit ki ju ai beit ‘Bym dei Khristan’ ne kiwei pat ïa kiba dang bat ïa ka niam tynrai.
U la ïathuh ba katkum ka jingïoh lum jingkheiñ kiba dei ha ka Niamkhasi Niamtre ka jingdon briew ka long palat ïa ka saw lak ngut bad kin sa ïoh jingkheiñ kham janai ynda la pynmih ha ka census 2027.
Shuh shuh u la ong ba ka kyrteng niam Khasi kam shym la duh, lada don ka ‘colum’ ban pyndap kito ki para kur parakha kin ai ïa ka kynhun niam jong ki Niamkhasi lane Niamtre.
Na ka liang u Bah Arwat K Sumer uba dei u Secretary ka Seiñraij Jowai u la ong ba ka Seiñraij Jowai ka la kubur lang ba ki don ka jingïadei kaba jan bha bad ki Seiñ Raij kiba don sha Rilum Jaiñtia bad Seng Khasi kaba don sha Rilum Khasi, ki iengskhem bad tylli mlon ban pynneh pynsah ïa ka niam ka rukom ïa ka dustur ka riti.
Haba ïadei bad ka jingthung Syiem ha ki lai tylli ki Hima, u Bah PD Nongrum u la ong ba ka Seng Khasi Kmie ka la kyntu ïa ka Khasi Hills Autonomous District Council (KHADC) kaba la ïalam mynta da ka Voice of the People Party ba kim dei ban thung Syiem da u bym don shuh ha ka niam tynrai ha ka Hima Sohra, Mylliem bad Khyrim namar kim nang shuh ban pyndep ïa ka niam ka rukom katkum ka riti dustur.
U la ong ka Seng Khasi Kmie kam tuklar ïa ka KHADC ïano kin thung Syiem hynrei kan sa phah da ka jingthoh sha ka KHADC ba kan thung Syiem ha kine ki lai tylli ki Hima ba ki dei ban long kiba dang bat ïa ka niam tynrai kiba lah ban pyndep ïa ka niam ka rukom. Kane ka jingkren jong u Bah PD Nongrum ka dei namar ba ha kine ki sngi ka KHADC kam shym la ai Sanad ïa u Maremdor Syiem uba dang bat ïa ka niam tynrai hynrei ka la thung Acting Chief da u bym dei u niam tynrai.
Shuh shuh u la ong ba ïa ka Hima Mylliem ruh ka KHADC ka la weng noh ïa u Paiem Ainam Syiem uba dang dei uba bat ïa ka niam tynrai.
