Khliehriat, Jylliew 02
Ki dkhot ka State Disaster Response Force (SDRF) ha ka 1 tarik Jylliew ki la ïoh ban sei ïa ka metïap jong uwei u rangbah, 41 snem rta na kawei ka krem dewïong kaba la iehshrah kaba don hajan ka ophis u Deputy Commissioner, Khliehriat, East Jaiñtia Hills District.
Ïa kane ka metiap la ïoh ban sei noh hadien hynriew sngi jong ka jingpyrshang ban wad hapoh kane ka krem dewïong kaba jylliew haduh kumba 120 phut.
Lyngba ka kyrwoh u Senior Staff Officer & PRO ka tnad Civil Defence & Home Guards, u Bah Paul Shylla u la ong ba ki dkhot na ka 1st SDRF Battalion na Shillong ka la hiar sha katei ka District ha ka 27 tarik Jymmang hadien ka jingïoh khubor ba u don uwei u briew 41 snem rta uba la hap hapoh katei ka krem dewïong ha ka 26 tarik Jymmang katba u dang thmu ban tong um dih.
U la ong ba ka kynhun ka la hiar mar mar sha katei ka jaka ban bishar bniah ïa ka jinglong jingman shwa ban sdang ïa ka kam ai jingïarap, hynrei namar ka jingkem dum jong ka suiñ bneng bad ka jingbym shngaiñ ka rukom long ka jaka, kumta ki la pynsangeh noh ïa kane ka jingpyrshang ban sei ïa une u briew ha katei ka juh ka sngi.
“Kane ka jingpyrshang ka la ïakynduh jingeh namar kane ka krem dewïong ka dei kaba la dap da ka um haduh kumba 40 phut, kaba la pynshem shitom ban poi sha ka jaka kaba une u briew u don,” u la ong haba bynrap ba na ka liang kiba haïing hasem jong une u lanot bad ki nongshong shnong ruh ki la ïarap lang ha ka ban buh ïa ka kor tan um ban pynduna ïa ka jingdon jong ka um bad ban kham pynsuk ïa kane ka jingwad.
Hadien ka jingpyrshang kaba la ïaid haduh hynriew sngi kynthih ha ka 1 tarik Jylliew ha ka por 6:30 mynstep, saw ngut ki dkhot ka SDRF ha ryngkat ka jingïarap jong ki arngut ki trai shnong ki la hiar sha kane ka krem ban wad ïa ka met jong une u briew bad dei ha ka por 9 baje ba ka kynhun ka la lap ïa ka met bad sei noh na kane ka krem dewïong.
Ïa kane ka metiap la aiti noh sha ki bor pulit ba kin leh ïa ki jingdonkam katkum ka aiñ.
