Jowai, Jylliew 02
Ka jingïalang ki heh Sorkar ka Meghalaya bad Assam kaba la long ha ka 2 tarik Jylliew ka la pynbeit bad shim ïa ka rai ha kaba ïadei bad ka kam rep kam riang da kaba mynjur ba ki nongshong shnong ka Lapangap ki lah ban bteng ïa ka kam rep kba jong ki ha ki jaka them katba ki nong Tahpat na Karbi Anglong kin bteng ïa ki kam rep ha ki jaka lum bad ki jaka ba sharing bad ruh ba kin pynneh ïa ka shongsuk shong shngaiñ.
Ha kane ka jingïalang high level ba la pynlong ha Assam Police Camp la ïadon lang ki nongmihkhmat saiñ pyrthei, ki heh ophisar, ki heh pulit bad ki nongmihkhmat na ki District Council ka Meghalaya bad Assam ban ïakren ïapynbeit halor ki jingeh kiba mih na ka jingïakajia pud ha Lapangap.
La pynlong ïa kane ka jingïalang kum ka jingbteng ïa ki sienjam ba la shim da u Myntri Rangbah ka Jylla u Conrad K Sangma uba la leit ïakynduh dang shen ïa u Myntri Rangbah ka Assam u Himanta Biswa Sarma na ka bynta ban wad ïa ki lad ki lynti ban pynbeit da ka lynti kaba jai jai halor ki jingeh kiba mih ha ka thaiñ Lapangap.
U Deputy Commissioner ka West Jaiñtia Hills u la ong ba hadien kane ka jingïalang la mynjur ba ki nongshong shnong ka Lapangap ki lah ban bteng ïa ka kam rep kba ha ki jaka them jong u lum uba don ha ka jingïakajia, katba ki nong Tahpat kin bteng ïa ka kam thung kam tep ha ki jaka lum bad ki sharing lum.
Katba halor ka kam pynbeit pud kaba neh ha ka jaka ba don hapdeng ka jingïakajia, u DC u la ong ba ïa kane ka kam yn sa shong bishar bniah bad shim rai da ki committee ba la thung da kine ki ar Sorkar. U la ong ruh ba ka jingïalang ka la rai ruh ba baroh arliang mamla ki dei ban pynneh ïa ka shongsuk shongshngaiñ bad ban kiar na kino-kino ki jingleh jingkam kiba lah ban pynmih ïa ka jingkulmar.
Kiba la mihkhmat ïa ka Meghalaya ha kane ka jingïalang ki kynthup ïa u Symbud Myntri Rangbah Bah Sniawbhalang Dhar, Principal Secretary Bah Frederick R Kharkongor, Commissioner & Secretary Bah Cyril V Diengdoh, Secretary Bah Garod LSN Dykes, Chief Executive Member ka JHADC Bah Thombor Shiwat, Deputy Commissioner ka WJH Abhinav Singh bad u Superintendent of Police ka WJH Jagpal Singh Dhanoa.
Katba kiba mihkhmat ïa ka Assam ki kynthup ïa u Dr. Tuliram Ronghang, MLA bad Chief Executive Member ka Karbi Anglong Autonomous Council (KAAC), u Member of Parliament Amarsing Tisso, Additional Chief Secretary (Home & Political) Ajay Kumar Tiwari, MLA bad Executive Member ka KAAC Surjya Rongphar, MLA bad EM ka KAAC Lunsing Teron, ki MLA Habbey Teron bad Niso Terangpi, Deputy Speaker ka KAAC Avijit Kro, ka Deputy Commissioner ka West Karbi Anglong Preeti Kumari bad Superintendent of Police, West Karbi Anglong Dinesh Kumar.
Lah ban pynkynmaw ba ki nongmihkhmat na kine ki shnong kila ïashong jingïalang ha ka 18 tarik Jymmang 2026, kaba la pynbeit da u Deputy Commissioner bad Superintendent of Police ka West Jaiñtia Hills. Hynrei kane ka jingïalang kam shym la lah ban shim rai namar ka jingïapher ki jingpynsngew haba ïadei bad ki rukom rep ki ban shah ha ka thaiñ.
U Rangbah Shnong ka Lapangap Bah Deimonmi Lyngdoh u la pynpaw ïa ka jingsngewnguh ïa u Myntri Rangbah ka Jylla Conrad K Sangma bad ïa u Myntri Rangbah ka Assam Himanta Biswa Sarma namar ka jingshimkhia ban wanrah pat ïa ka jingsuk hapdeng ki ar Jylla.
U pyntip ba ki nongshong shnong kila kmen ba kila lah ban leit pat sha la ka jong ka jaka rep lashai ka 3 tarik Jylliew 2026.
