Shillong, Jylliew 02
U Superintendent of Police (SP) ka East Khasi Hills, Bah Vivek Syiem ha ka Sngi Ba-ar u la ong ba 4 ngut ki khynnah kiba la ïathuh ba ki la jah rngai na Jorhat la ïoh ban buddien bad lap (ïa ki) na kawei ka ‘Hotel’ kaba don ha Police Bazar ha ka Lah Sngi U Blei.
“Hynnin ka sngi ngi la ïoh jingtip ba 4 ngut ki khynnah – 2 ngut ki shynrang bad 2 ngut ki kynthei – ki la jah rngai na Jorhat,” la ong u SP.
Ka kynhun na Sadar Police Station bad Women Police Station ki la pynlong ïa ka jingwad bad ki la lap ïa kine ki khynnah na J.K.International Hotel, Police Bazar.
Kine ki khynnah ki dei kiba hapdeng ka rta 16 bad 17 snem. Ha kajuh ka por, la lap ruh ïa uwei u shynrang uba 26 snem ka rta bad ki, la ïathuh ki pulit.
“Ha ka jingtohkit, kitei ki khynnah kynthei kiba jah rngai ki la pyntip ba ki dei shi paralok bad ki 2 ngut kiwei pat ki khynnah ki dei shi para arkmie,” la ong u Bah Vivek.
“Ki la wan ha ka 31.05.26 bad ki la wan na ka bynta ban leit jngoh kai khlem da pyntip pat sha la ki kmie ki kpa,” u la ong.
Ka kynhun pulit na Jorhat ha ryngkat ki bahaïing hasem jong kitei ki khynnah ka la poi ha Sadar Police Station ha ka Lah Sngi U Blei, bad la aiti noh ïa kitei ki khynnah ba hapoh 18 snem ka rta sha ki, la bynrap u SP.
Shuh shuh ka jingtohkit ki pulit kam shym la kdew ïa kano-kano ka kam be-aiñ ha kane ka por. Ïa ki jingtohkit ba bniah la khmih da ki pulit jong ka Jorhat.
