Shillong, Jylliew 02
Ki kontraktor kiba hap hapoh ka shatri jong ka Khasi Jaiñtia Government Contractors & Supplier Association (KJGCSA) ha ka sngi Ba-ar jong ka taïew, ki la aiti ïa ka dorkhas ha u Myntri Rangbah ka Jylla u Conrad K Sangma, ban phah tuklar mardor halor ki jingeh kaba ki mad.
Ha ka dorkhas, ka Association ka la ong, ba ki kontraktor jong ka Khasi Jaiñtia ki la shah pynduh ïa ki kabu ban ïashimbynta bad ban ïoh jingmyntoi na ki projek Sorkar hapoh jong ka Jylla.
Ka la bynrap ruh “Ïa ki mat kiba ïadei bad ka jingbym biang ka rukom siew ne pyllait ïa ki Bill” kaba la ktah ïa ki dkhot ka longïing longsem bad ruh ka jingbym lah ban trei ïa ki kam ki jam.
Ka Association ka la pynpaw halor ki 4 tylli ki mat jingdawa kiba kongsan. Halor ka Jal Jeevan Mission, ka la kyntu ïa ka Sorkar, ba kan shimkhia halor ka jingsahteng ban siew ïa ka pisa bad la bynrap “Namar ba ïa ka Bill jong ka JJM kadei kaba ym pat siew pynkhuid, bun ki kontraktor ki la mad ïa ka jingeh ha kaba ïadei bad ka pisa pilaiñ”.
Ha ka dorkhas, la kyrpad ruh ïa ka jingtuklar ban bthah ïa ka tnad PHE, ba kan siew pyndep noh ïa kumba 50 percent jong ka pisa lyngba kiwei pat ki tyllong. Ki kontraktor ki la kyrpad ruh ban pynkloi noh ha ka ban pyllait ïa ka pisa ne ki Bill kiba dang sahteng jong ki skhim ka Sorkar Pdeng hapoh jong ka tnad Water Resources na ka bynta u snem 2024-2025.
Ha kaba ïadei bad ka PWD Roads, ka Association ka la ong, ba ka rukom leh ha ka ban khot ïa ki Tender ha ki ‘Packages’ khlem da phiah ïa ki kam, ka la ai jingmyntoi tang ïa ki katto-katne ngut ki heh kontraktor, da kaba pynduh lad noh ïa ki kontraktor jong ka Jylla.
Ka Association ka la kyntu ïa ka Sorkar “Ba kadei ban phiah noh ïa ki Tender ban ai lad ïa ki kontraktor ka Jylla ban ïoh ïashimbynta bad ban kyntiew ïa ka kamai kajih bad ïa ka jingdon ïa ka kyrdan ïa ka kam kaba pyntrei”.
Nalor kane, ka Association ka la kyrpad ba dei ban pynkut noh ïa kano-kano ka rukom leh ka bym long ha ka lynti kaba khuid bad ka bym shai kdar.
“Ki tnad Sorkar kidei ban pynthikna ïa ka jingkhuid bad ka jingshai kdar ka rukom treikam ka jong ki lyngba ka jingkhot ïa ka tender. Kane kan kyntiew ïa ka jingïashim bynta, ka ban long ha ka lynti ka bym ïa shah liang, ka jingdon ïa ka kyrdan ha ka jingtrei ïa ka kam bad ka jingpynlut ïa ka pisa ha ka rukom kaba biang bha” la ong ha ka dorkhas.
Namarkata, ka Association ka la kyrpad ba dei ban pynsangeh ïa ki ‘Close Tender’ bad ka jingbthah ban trei lypa ïa ki kam, ha kaba ïadei bad ka PWD Roads khlem ka jingpynmih ïa ka hukum ba la bhah ïa ka kam bad ka la kyrpad ba dei ruh ban pynsangeh noh ïa ki kam jong ka tnad Soil & Water Conservation, Wildlife bad Forest.
“Dei ban khot Tender ïa ki kam, ban ai lad ïa ki kontraktor ka Jylla ba kin ïoh ïashimbynta” la ong ka Association ha ka dorkhas.
Ka Association ka la ai ruh ka jingïaroh ïa ka Sorkar ha ka jingpyrshang ban theh ïa ki kam pynroi bad ka Association ka la ong, “Ngi kyrpad ïa phi ba phin tuklar lem ban pynthikna, ba ki kontraktor kiba na ka Jylla kim dei ban duh noh ïa ki lad ban kamai jakpoh bad ïa ka bhah kaba dei hok, ha kaba ïadei bad ki jingïaid jong ki kam pynroi”.
