Shillong, Jylliew 02
Ka Hynñiewtrep Border Dispute Redressal Forum (HBDRF) hapoh ka jingïalam u Bah Chan-dame Sungoh, Chairman ka Forum ha ka 02 tarik u Jylliew 2026, ka la leit ban ïakynduh ïa u Myntri Rangbah ka Jylla, u Conrad K Sangma ban dawa pynithuh bad pynrung noh ïa ki shnong Khasi-Pnar kiba don ha Block-I hapoh ka jingkhmih ba pura jong ka Meghalaya, da kaba ong ba ka jingkynthup ka dei ban pynïoh ïa ki hok bad ki jingshakri ba kongsan na ka bynta ki nongshong shnong.
Haba kren sha ki lad pathai khubor u Bah Chandame u la ong “Ngi pynpaw ka jingsngewkhia, ba watla ngi la phah da ka jingthoh la bun bha sha ka Sorkar Jylla hynrei haduh mynta ka Sorkar kam pat lah ithuh ïa kine ki shnong, kiba don hapoh Block-1, ban hap noh sha ka Jylla Meghalaya”.
U la ong ruh ba ki shnong kiba don Block-2, ki la ïoh epic, ki skhim bapher-bapher bad kiwei pat ki kot ki sla ba donkam, hynrei haduh mynta ka Sorkar Meghalaya kam shym la kynthup bad ithuh ïa ki shnong ba don hapoh Block-1, kaba pynshem jingeh ban ïoh ki kot ki sla kiba donkam.
Namarkata, u ong “Ngi kyrpad ïa u Myntri Rangbah, ban ithuh bad kynthup noh ïa baroh ki Shnong Khasi Pnar kiba don ha Block-1, hapoh ka Jylla Meghalaya”.
U la kdew ruh ïa ki sienjam ba la shim da ka Jaiñtia Hills Autonomous District Council (JHADC), kaba la ai jingithuh ïa ka Elaka Labang Nangphyllut lyngba ka Notification NO. JHADC/POL/23/2021/19, ha kaba la thung ïa u Bah Prolin Samayang, kum u Acting Dolloi da kaba ai Sanad (Certificate).
Haba ban jur ïa ka jingdonkam ban shimkhia mardor ïa kane ka kam, u Bah Chandame u la ong, “Ka long kaba kongsan tam ba ka Sorkar Jylla kan ithuh bad pynrung ïa kine ki shnong hapoh ka Jylla Meghalaya, ban pynthikna, ba ki nongshong shnong jong kine ki jaka kin ïoh ïa ki lad ki lynti ha baroh ki liang bad ki jingdonkam”.
Kumta u la ïathuh ba ha ka jingïakynduh, na ka liang u Conrad u la kular ban pynlong ïa ka jingïalang kaba kyrpang haba ïadei bad kane ka bynta, ha kaba ka Forum ka la khmih lynti ba ka jingdawa kan urlong noh shen.
Haba bynrap na ka liang u Bah Thomas Passah, Nongaiktien ka HBDRF u la ong, ba ha kane ka jingïakynduh ïa u Myntri Rangbah, la ïakren ruh halor ka jingmad jingeh ki nongshong shnong ka Lapangap, wat haba ka Sorkar ka la phah da ki pulit SF-10. Haba ïadei bad kane ka kam u Bah Thomas u la ïathuh, ba u Myntri u la pyntip ha halor kane ka kam ha Lapangap, ka Sorkar ka la dep ban ïakren bad ka Sorkar Assam bad mynta ka sngi la ïarai ban ai lad noh ïa ki nongrep ban leit rep.
Kumta u la khmih lynti ba kane ka jingkular kan dei kaba shisha, bad ong ruh ba dei ban phah lang ïa ki pulit ban synran ïa ki nongshong shnong, haba la shah ïa ki ban leit rep.
