Shillong, Jylliew 02
Ka Voice of the People Party (VPP) State Youth Wing ha ka 02 tarik u Jylliew 2026, ka la leit ban ïakynduh ïa u Commissioner & Secretary Food and Civil Supplies, u Pravin Bakshi halor ka jingshah weng kyrteng ki long ïing na ka ‘card ration’, hadien ba la pyndep ïa ka EKYC.
Ha ka kyrwoh ba la phah, ka State Youth Wing ka la dawa ba dei ban pynneh shuwa kumjuh ïa baroh ki nongïoh jingmyntoi tad haduh ynda la dep ban leh ïa ka khana samari.
Haba ïadei bad kane, ka VPP ka la pyntip ba na ka liang u Commissioner & Secretary ka Food and Civil Supplies u la kular ban peit halor kane bad ban pynbeit ruh ïa ki jingduna baroh.
Hadien ka jingtohkit ka State Youth Wing, ba haduh katno kiba aplai thymmai ïa ki BPL Card, na ka liang jong u Commissioner u la ïathuh “Haduh mynta ki la don haduh 90,000 tylli ki ‘application’ ba thymmai. Ka State Youth Wing ruh ka la dep ban ai jingmut haba ki jied ïa kine kiba aplai thymmai, kidei ban da leh sani bha bad ban pynthikna, ba kiba ïoh kin dei kiba donkam shisha bad kiba long hok ban ïoh ïa ka Card BPL”.
