Shillong, Jylliew 02
U nongïalam ka NPP uba dei ruh u Myntri Sorkar, Bah Wailadmiki Shylla ha ka Sngi Ba-ar u la ong ba kam don kano-kano ka jingïapher jingmut hapoh ka seng ha kaba ïadei bad u kyrtong Rajya Sabha, da kaba bynrap ba ka rai ba khatduh ka shong ha ki bor ba ha khlieh duh jong ka seng.
“Peit, khlem artatien, ngan don la ka jong ka jingsngew, kiwei ruh kin don la ki jong ki briew kiba ki kwah ban pynmih shakhmat, kumta, kata kam mut pat ba ka don ka jingïapher jingmut, ka dei ka hok jong baroh ban sei la ki jong ki briew kiba ki ïohi ba ki long kiba i-bit,” ong u Bah Wailad sha ki nongthoh khubor.
U la ban jur halor ka jingïatylli jong ka seng wat hapdeng ka jing-ïakren halor ka jingmih jong bun tylli ki kyrteng.
“Kum ka seng, kumba la ong u Myntri Rangbah, ki Symbud Myntri Rangbah bad kiwei-kiwei, ka NPP ka dei kawei ka longïing kaba heh bad kaba suk ba kmen, kumta katba rai ki nongïalam jong ngi, ngi burom ïa ka rai jong ki,” u la ong.
Haba kylli, u la ong, “Ki don kumba 3-4 tylli ki kyrteng kiba la mih, ha ki lad pathai khubor ruh ka la mih, hynrei kumba nga la ong, haba khatduh hi, ka dei ka rai jong ki nongïalam ba hakhlieh duh jong ka seng.”
