Shillong, Jylliew 03
Ka Meghalaya Demo-cratic Alliance – II (MDA-II) ha ka Sngi Balang da kawei ka sur ka la shim ïa ka rai ban pynïeng ïa u James P.K. Sangma jong ka National People’s Party (NPP) na ka bynta ka shuki Rajya Sabha na Meghalaya, ha kaba ïa ka jingthep ‘vote’ la pynbeit ban long ha ka 18 tarik Jylliew.
Ïa kane ka rai la pdiang ha ka jingïalang Parliamentary jong baroh ki nongïalam seng kiba don ha ka Kynhun Synrop MDA-II, ba la pynïaid da u Myntri Rangbah ka Jylla, u Conrad K. Sangma.
Haba pynbna ïa kane, u nongïalam ka UDP, u Bah Paul Lyngdoh u la ong, “Ïa ka jingïalang Parliamentary jong ki nongïalam kiba mihkhmat ïa baroh ki seng saiñ pyrthei kiba don hapoh ka MDA-II, la pynshai shaphang ka ilekshon kaba la buh ban long sha ka Rajya Sabha na ka bynta ka Jylla Meghalaya ha ka 18 tarik u Jylliew, 2026 bad ki jingai jingmut jong ka NPP halor kane ka kam da u National President bad State President (ka NPP).”
Ha katei ka jingïalang, katto-katne ngut ki seng kiba ïateh lok ki la mih shakhmat bad la ki jong ki kyrtong.
“Ki dkhot na ki seng ha ka Kynhun Synrop ki la pynpaw ïa ki mat bapher-bapher bad ki la kdew ïa ka jingkwah jong ki ban jied bad pynskhem ïa ki kyrtong jong ka seng (jong ki) kum u kyrtong ba pura ka MDA,” u la ong.
Ha ryngkat ki kyrteng kiba bun kiba la sei shakhmat bad khlem ka jingjied kaba ïamon lang, ka kynhun ka la jied ïa ka ‘Standard Precedent’, kata ban bud ïa kaei kaba ju leh da kaba kyrshan lang ïa u kyrtong ba la jied da ka seng kaba bun paid eh.
“Namarba ki seng bapher-bapher ki la tyrwa ïa ki kyrteng bapher-bapher jong ki ‘riew shimet kiba dei na ki seng saiñ pyrthei bapher-bapher bad namarba ym shym la poi sha kano-kano ka jingïamynjur lang halor kawei ka kyrteng, la rai ban bud ïa kaei kaba ju leh barabor – ban kyrshan ïa ka jingtyrwa ba la buh da ka seng kaba heh tam ne bun paid eh, kata, ka NPP,” ong u Bah Paul.
U la ong ba kane ka sienjam ka thmu “ban pyntikna ïa ka jingïatylli bad ka jingïamynjur ha ka nongrim jong ka rukom treikam ‘Parliamentary’ kaba la don.”
“Ka jingïalang namarkata, da kawei ka sur ka la mynjur ïa ka jingtyrwa jong ka NPP ban pynïeng ïa u James P.K. Sangma kum u kyrtong Rajya Sabha u ban mihkhmat ïa ka MDA-II,” la ong u Bah Paul.
Katei ka Kynhun Synrop ka la pynbeit ruh ïa ka bynta haba ïadei bad ka ilekshon shiteng samoi sha ka Shillong Lok Sabha ka ban sa long shen.
“La mynjur lang ba ki seng ki long kiba laitluid ban ïakhun/kyrshan/ban long pdeng/ban kiar na ka ilekshon shiteng samoi ba la kdew haneng,” u la ong.
U Myntri Rangbah ka Jylla, u Conrad K. Sangma u la ong ba kane ka jingïalang ka don tang kawei ka mat ïakren bad u la ai khublei ruh ïa ki dkhot na ka bynta ka jingïatylli. U la pyntikna ba ka jingthep kyrteng kan long ha ka 5 tarik Jylliew.
Haba batai ïa katei ka rai, u Conrad u la ong ba ki jingïakren kiba bniah kim shym la poi sha ka jingmynjur lang.
“Ka jingïakren kaba bniah ka la long, bad dei na kata ka daw ba ngi la shim por, hynrei ha kaba kut, namarba ngim shym la poi ka jingmynjur lang halor ki jingkwah bapher-bapher jong ki seng saiñ pyrthei bapher-bapher, ngi la poi sha ka jingmynjur bad baroh ngi la mynjur ba ngin ïaid katkum ka rukom synshar paidbah bad ailad ïa u kyrtong jong ka seng kaba heh tam ban ïoh jingkyrshan,” u la ong. U la ban jur ba baroh ki seng ki la soi ïa katei ka rai.
Shuh shuh u Conrad u la pynshai ïa ka jinglong-jingman jong ka rukom thep kyrteng.
“Ka long kaba donkam ban tip ba u kyrtong uba ngi tyrwa mynta um dei u kyrtong jong ka seng saiñ pyrthei hynrei la pdiang ïa u da ka rai kum u kyrtong jong ka MDA-II,” u la ong.
