Jowai, Jylliew 03
Ki nongshong shnong jong ka shnong Lapangap hapoh West Jaiñtia Hills District kiba dei ki nongrep ki la ïoh lad ban hiar rep biang sha ki pynthor jong ki, kiba don markhap bad ka shnong Tahpat.
Ha kane ka sngi jong ka jingsdang ban ïoh hiar biang sha ki pynthor bad lyngkha rep, la ong ba ki la don tang khyndiat ngut kiba la hiar hynrei ym dei ba ki la hiar ban sdang ka rep ka riang hynrei ban lum bad pynkhuid shwa ïa ki pynthor rep kiba la dap da ki bilor pait bad ki dieng shiah kiba la bret da ki Karbi ha ki por ba dang don ka jingïakynad bad khang ïa ka kam rep kam riang ha kane ka bynta.
Kane ka jingïoh lad ban hiar rep biang, ka la urlong hadien ka jingïalang ki heh sorkar ka Meghalaya bad Assam kaba la long ha ktem ki pulit Assam kaba don ha Pynthor Lapangap ha ka 2 tarik Jylliew.
Ha katei ka jingïalang la mynjur ba ki Lapangap kin bteng ïa ka kam rep ha Pynthor naduh ka 3 tarik Jylliew bad ban pynneh ïa ka shongsuk shong shngaiñ. La rai ruh ban rep lang ki Lapangap bad ki Tahpat ïa ki jingthung kum ka kait, sohtrun, sying bad kiwei kiwei de ha Lum Pynthor.
Haba ïakren bad u waheh shnong ka Lapangap u Ma Deimonmi Lyngdoh u la ïathuh ba mynta ka sngi la don tang khyndiat ngut ki nongrep kiba hiar sha pynthor.
U la ïathuh ba ki nongrep kim pat shym la rep, hynrei ki la hiar ban lum ban lang shwa ïa ki bilor bad ki diengshiah ba la bret da ki nong Karbi shapoh ki pynthor kba jong ki Lapangap.
