Shillong, Jylliew 03
U nongaibuit ka East Khasi Hills Local Taxi Welfare Association (EKHLTWA) u Bah Disparsing Rani, u la kyntu ïa ki paidbah nongbuh kali ba kin long kiba husiar haba ki leit ban theh umphniang kali (Petrol & Diesel) ha ki jaka theh umphniang.
Haba kren sha ki nongthoh khubor ha ka sngi Balang u Bah Disparsing Rani u la pynpaw ba u la ïoh ïa ka jingujor bad ki sakhi satar kiba thikna na ki trai ba buh kali ba ka jur bha ka jinglehtuh ha ki jaka theh umphniang kali ha nongbah Shillong.
U la ïathuh ba u la ïoh ka jingujor na uwei u trai kali u ba theh umphniang kali 186 litre, na kawei ka jaka theh umphniang, katba u GPS (Global Positioning System) jong ka kali u kdew ba ka umphniang ka don tang 173 litre, kaba mut ka umphniang kali ka duna 13 litre na kaba la siewdor.
U la kyntu ïa ki trai kali ba kin buh ïa u GPS ha ka kali jong ki, khnang ban lap, lada don ka jingshah lehtuh haba ki leit ban theh umphniang ha ki jaka theh umphniang, nalor kata u la kyntu ruh ïa ki paidbah ba kin long kiba husiar haba ki leit ban theh umphniang kali, ha kajuh ka por u la kynnoh ba kane ka jingleh ki trai jaka theh umphniang ka dei ka kam ba be-aiñ bad haba ïadei kane ka jingjia u la ïathuh ba un sa leit ban ujor sha ka ‘Consumers Forum’ lane sha ki kompeni.
