Shillong, Jylliew 03
U Symbud Myntri Rangbah ka Jylla Bah Prestone Tynsong uba khmih ïa ka tnad Kam Pohïing ha ka sngi Balang u la ong ba ka Sorkar Jylla kam pat pynsangeh ïa ka projek lynti rel hynrei kan pynïaid shakhmat tad hadien ba la ïoh ïa ka jingmynjur lang na ki kynhun bapher-bapher.
U la ban jur ba ka jingpynurlong ïa ka jingdawa pyntreikam ïa ka Inner Line Permit (ILP) ka dei ka jingdonkam ba mynta jong ka Jylla.
Haba kyntait ïa ki jingïakren ba la pynsangeh ïa ka projek, u Bah Prestone u la ong, “Kam dei ka jingkylli ban pynsangeh ïa ka projek. Ngim pat ju ong ba ngin pynsangeh ïa ka. Kaei kaba ngi ong ka long ba ngin shim ïa ka jingmynjur lang jong baroh. Kane ka dei ka mat ba hakhmat eh”.
U la ong ba ki jingsngew u paidbah ki long kiba shai halor ki kam kiba donkam.
“Ïa mynta, ka kam kaba kongsan eh ka dei kaba dang sahteng. Ki Kynhun bapher-bapher, wat ki nongshong shnong ka Jylla, ki kwah ILP. Lada la mynjur ïa kane, ïa ka sobjek kaba ar, ka projek lynti rel, ngin sa ïakren,” u la ong.
Ka projek lynti rel ha Ri-lum Khasi kala sahkut namar ka jingpyrshah kaba jur na ki kynhun bapher-bapher kynthup ki Sengbhalang. Kane ka projek ka kynthup ïa ka lynti rel na Tetelia-Byrnihat ba 22 Km bad ka lynti rel na Byrnihat-Shillong ba 108 km.
Halor ka jingtyrwa ker sainar ha khappud ka India-Bangladesh, u Bah Prestone u la ïathuh ba um pat don ka jingïakren eiei hynrei la khmih lynti ba kane ka kam kan sa mih ha ka jingïakren hapoh ka jingïalang ka NEC.
Ka 73rd NEC Plenary kala long ha Shillong naduh ka 3 tarik Jylliew haduh ka 5 tarik Jylliew bad yn pynïaid ïa ka da u Myntri ka tnad Kam Pohïing ka Ri u Amit Shah.
