Mawkyrwat, Jylliew 03
U kyrtong ka NPP sha ka ilekshon MP shiteng samoi Lok Sabha, u Dr. DRL Nonglait ha ryngkat ki nongïalam ka NPP ha ka 3 tarik Jylliew, 2026 ki la hiar sha ka shnong Wahkaji, South West Khasi Hills District ban ïalap ilekshon ha kaba ki la pan jingkyrshan na ki paidbah ka thaiñ Wahkaji bad Warsan Lyngdoh ba mynta ka kynti kin ailad noh sa ïa ka NPP ba kan mihkhmat ïa ka Ri-lum Khasi-Jaiñtia hapoh Lok Sabha.
Ha kane ka jingïalang kaba la wan ban sakhi da ki paidbah ka thaiñ, u Dr. Nonglait u la khot la wer ïa ki paidbah ba ki dei ban long kiba ïatylli bad ban weng noh ïa ka jingsngew party bad ka jingïapait ïapra.
U la ong ruh ba lada ka NPP ka jop, kan pynsuk shibun ïa ka Jylla ha ka jingïakhun ban pynrung ïa ka Ktien Khasi ha ka Khyrnit kaba Phra jong ka Riti Synshar ka Ri India bad kumjuh ruh ban pynïoh ïa ka Inner Line Permit (ILP) hapoh ka Jylla kaba kine baroh artylli la dep ban mynjur ïa ka Resolution hapoh ka ïingdorbar thawaiñ.
Nalor kane, u Dr. Nonglait u la ong ruh ba lada u jop kum u MP, un pyrshang katba lah ban kren halor ki jingdonkam kiba bun ha kaba un leit ïasaid sha Delhi ban pynheh ïa ka song pisa na ka bynta ki kam pynroi bapher-bapher naduh ki nongrep, ka kam ri jingri, ki sengkam lajong, ka pule puthi hapoh ka Jylla bad kiwei-kiwei.
Shuh shuh u la pynpaw ruh ba u don ïa ka jingangnud ban pynim ïa ka riti ka dustur, ïa ka akor ka burom ka ktien ka thylliej kum ki longshwa kaba u la shim kum u nonghikai bad u nongthoh bad mynta haba un ïakhun ïa ka ilekshon ruh un bteng ban ïakhun na bynta kine.
“Kito ki dei ki kam jong u paidbah ba nga pyrshang ban leh bad aiu ngan leh shuh shuh na bynta u paidbah,” ong u Dr. Nonglait, kumta u khot u wer ïa ki paidbah ka thaiñ Wahkaji bad ka Ri Khasi Jaiñtia ba lada kin jied ïa u kum u MP un leit mynta ym shuh kum u nongthoh ne u Professor lane u Director jong ki kolej, hynrei un leit ha kawei pat ka dur kum u MP bad hangta un sa pyrshang ban leh kham bha shuh shuh ïa ka ri bad ka jaidbynriew.
Kiwei pat kiba la ai jingkren ha kane ka sngi ki kynthup ïa u Bah Kitborlang Nongrem, State Secretary ka NPP ba dei peit ïa ka South West Khasi Hills, u Bah Hamletson Dohling, Working President ka NPP Meghalaya State Unit.
