Shillong, Jylliew 03
Ka North Eastern Council (NEC) kan pynlong ïa ka Plenary Session kaba 73 ha ka 4 tarik Jylliew, 2026 ha Shillong, Meghalaya hapoh ka jingpynïaid jong u Myntri Kam Pohïing ka Sorkar Pdeng bad u Chairman ka NEC, u Amit Shah. Ha kane ka jingïalang yn ïadon lang u Myntri Sorkar Pdeng ba dei khmih ïa ka tnad Development of North Eastern Region (DoNER) uba dei ruh u Vice Chairman ka NEC, u Jyotiraditya M. Scindia; u Myntri Khynnah ba dei khmih ïa ka tnad DoNER, u Dr. Sukanta Majumdar; ki Lat bad ki Myntri Rangbah jong phra tylli ki jylla ka thaiñ shatei lam-mihngi; kiwei pat ki dkhot jong ka Dorbar; bad ki heh ophisar jong ka Sorkar Pdeng bad ki Sorkar Jylla.
Ka jingïalang shwa ka Plenary ba la ïakren halor ki sienjam ba kongsan kum ki kam ba ïadei bad ki siej, Agarwood, bad Ashtalakshmi Darshan, bad kiwei kiwei ki mat ka la long ha ka 3 tarik Jylliew, 2026. Ha kane ka jingïalang la ïashim bynta da u Secretary, MDoNER bad ki Chief Secretary jong phra tylli ki jylla ka thaiñ shatei lam-mihngi, Secretary, NEC lem bad ki heh ophisar jong ka tnad DoNER, NEC, ki sorkar jylla bad kiwei kiwei ki tnad Sorkar Pdeng.
Ka North Eastern Council, kaba la sdang hapoh ka North Eastern Council Act, 1971, ka long kum ka kynhun pynkhreh kam kaba heh tam ha ka thaiñ na ka bynta ka thaiñ shatei lam-mihngi bad ka don ka bynta kaba kongsan ha kaba kyntiew ïa ka roi ka par kaba ryntih bad pynkhlaiñ ïa ka bor jong ka synshar paidbah kaba ïatreilang ha ka thaiñ.
Ka Plenary Session ha ka 4 tarik Jylliew, 2026 kan ïakren bad pyrkhat sani halor ka jingïaid shaphrang jong ki CM High-Level Task Force ba la sdang na ka bynta ki kam kiba kongsan jong ka roi ka par ha ka thaiñ. Yn ai ïa ki jingbatai shaphang ka kam jngohkai pyrthei; Ka rep ka riang bad ka kam Horticulture; ka Jingkyntiew ïa ka jingbei tyngka; ka Jinglah kyrshan dalade ha ka kam ba ïadei bad ka Dud, ki pylleng, ka Dohkha, bad ka Doh; ka jingkyntiew ïa ka kam ïalehkai; ka jingkyntiew ïa ki lad ka ïoh ka kot; ki jingdon jingem bad jingpynïasoh; bad ka jingthaiñ jaiñ & jingtrei kti. La khmih lynti ba ki jingïakren kin pynsuk ïa ka jingtreikam kaba ïatreilang hapdeng ki Jylla bad kito kiba don bynta ha kane ka kam na ka bynta ban pynurlong ïa ki thong na ka bynta ka roi ka par.
Ka jingïalang kan peit bniah ruh ïa ki sienjam ba kongsan jong ka tnad DoNER, kynthup ïa ki jingpynbna halor ki skhim bad ki prokram ba kongsan, ki jingmih na ka North East Investment Summit bad ka Bankers’ Conclave, ki sienjam ba ïadei bad ki samla, bad ki jingpyrshang kiba ïadei bad ka kam jngohkai pyrthei, ka jingpynpoi mar, bad ki projek Unique Selling Proposition (USP) ha ka thaiñ.
Ha ka Plenary Session yn ïakren ruh shaphang ka North East Vision Plan 2047, kaba thmu ban pynbiang ïa ka rukom treikam kaba jrong samoi ban pynkylla ïa ka thaiñ shatei lam-mihngi sha ka jaka pdeng kaba khlain ha ka jingkiew ka ïoh ka kot, ka jingpynïasoh, ka jingsaiñdur thymmai, ka jinglah ban ïaineh, bad ka jingriewspah ka kolshor shuwa ka jingdap shispah snem ka jingïoh laitluid jong ka ri India.
Ki dkhot jong ka North Eastern Council kin ïasam ruh ïa ki jingmut jong ki halor ki jingthmu pynroi ha ka thaiñ bad ki lad ki lynti ban pynkhlaiñ ïa ka jingïatreilang hapdeng ki jylla.
