Shillong, Jylliew 03
Ka Voice of the People Party (VPP) Mawsynram Constituency ka pynpaw ba ka pyrshah jur ïa ka jingleh ka Sorkar Jylla, ba ka la aiti ïa ka kam sam bording sha ka SAI Computer Company Ltd hapoh ka Mawsynram Sub-Divison.
“Ka SAI Computer Company Ltd ka dei ka kompeni bar Jylla ba la ïoh ban treikam khlem da ïoh ïa ka No Objection Certificate (NOC) na ka Dorbar Shnong bad khlem ka jingïoh Trading License na ka shlem treikam ka Khasi Hills Autonomous District Council” ong ka kyrwoh khubor u Secretary ka VPP Mawsynram Constituency.
Shuh-shuh la ong ba ka VPP ka ai jingkyrshan ba pura ïa ka jingïakhih ba la ïalam da ki synjuk ki khlieh nongsynshar shnong Mawsynram C&RD Block kumjuh ki Sengbhalang ka thaiñ. “Kum ka party ngim lah ban shu shong kli kti ban peitkai ïa ka ïap ka im ki paidbah haba ka Sorkar ka shu leh donbor, ka Sorkar kaba dei ban peit ïa ka bha ka miat ki rit ki ria, kaba dei ban sngap ïa ka jingkyrpad jong ki paidbah kiba la mad shibun ki jingeh ha kaba ïadei kane ka kam. Kum ka party ngi sngewsynei ïa ki bapli ki nongpyndonkam bording, kiba bylla mynsngi bad bam da miet, ka jingaiti ha ka kompeni ka ktah ïa ka ïoh ka kot jong ki barit baria bad kdew ba kiba bun ki dei ki nongrep.”
Namar kata ka VPP ka pynrem jur ïa kane ka jingleh jong ka Sorkar Jylla bad ka la ai jingmut ba ka Sorkar ka dei ban weng noh mardor ïa kane ka kompeni bad ba ka MePDCL kan shimti hi ban sam bording ïa ka Sub-Division baroh kawei.
“Lada ka Sorkar ka dang kuman na ka liang ka party ngi don hok ban shim kino-kino ki sienjam kiba tyngeh na ka bynta ka bha ka miat ki paidbah ka thaiñ kiba ïakynduh ïa kane ka jingeh” la ong ka kyrwoh.
