Shillong, Jylliew 03
Ki trai jaka trai khyndew jong ka thaiñ Nongkroh ba hap hapoh ka Thadlaskeiñ C&RD Block ki la sah ha ka umdum, hadien ba ki la ïoh pdiang ïa ka bai die jaka na ka Indradhanush Gas Grid Limited (IGGL) tang ha ka dor T. 50 shi Sqft, watla ka jingïakut ka long T.1500 shi Sqft.
Haba kren sha ki nongthoh khubor ha ka sngi Balang u la ïathuh ba kane ka jingthied jaka ka kompeni ka dei na ka bynta kan pynïaid ïa ki Pipe Gas (Gas Pipeline) na ka bynta ban pynpoi Gas sha ki Jylla jong ka thaiñ Lam-Mihngi jong ka ri.
U la ïathuh ba haba ïadei bad kane, u la ïoh kiba bun ki jingujor na ki trai jaka, kaba la pynlong ïa u ban pan jingtip lyngba ka RTI na ka ophis u Deputy Commissioner ka West Jaiñtia Hills District haba ïadei ka dor ba ka kompeni ka siew sha ki trai khyndew.
Shuh-shuh u la ïathuh ba katkum ka RTI ba u la ïoh, u la lap ba ka dor jaka ka dei 50 tyngka shi Sqft, ym kumba la pynpaw da ki trai jaka, kaba ki la kam ba ki ïoh jingpynshai na ka Sorkar ha ka dor T. 1500 shi Sqft, Kumta u la ong haba nujor katkum ka jinglap lyngba ka RTI bad ka jingïathuh ki trai khyndew, lehse ka dei ba ki trai khyndew ki la shah thok.
U la ïathuh ba haba ïoh ïa kane ka kaiphod kiba bun ki briew kiba dei ki trai jaka ki la dap da ka jingsngewdiaw. Nalor kata u la ïathuh ba ka don ka jingpyn ïapher ïa ka dor ba ka Sorkar ka siew sha ki paidbah.
U la bynrap ba ki paidbah ba don jaka nangne shakhmat ki dei ban long kiba husiar, khnang ba kin lait na kum kine ki jingshah thok.
