Nongstoiñ, Jylliew 03
Hadien san bnai ba la pyndep ïa ka jingleit jurip, ka Mawshynrut konstitwensi ka la long kawei na ki konstitwensi kaba la donbok shisha, ha kaba mynta ka kynti ka la ïoh sa ïa ka Government Model Degree College kaba la bei tyngka da ka Ministry of Human Resources jong ka Sorkar Kmie lyngba ka Rashtriya Uchchatar Shiksha Abhiyan (RUSA) ha kaba ïa kane ka college mynta la sdang ban pyntrei.
Lah ban kdew ba ha kaba ïadei bad katei ka college na ka liang u Bah Methodius Dkhar, Myntri ka Sorkar Jylla bad MLA ka Mawshynrut ha ryngkat ka jingïadonlang ki riew rangbah bad ki nongshong shnong na ka thaiñ dang myn ha u bnai Nohprah 2025 ki la leit ban jurip bad ai laiñ ïa katei ka jaka na ka bynta ban shna noh ïa ka building ba pura jong ka college kaba la mang haduh kumba 15 klur tyngka eiei bad mynta la ïohi ba ki kam ki la sdang ban kren khamjam ban ïa ka ktien.
Haba kren bad u nongthoh khubor, u Bah Breswell Paliar uba dei uwei na ki riew rangbah jong ka thaiñ u la ong ba ka jingïoh ïa kane ka college Sorkar kan kham pynsting ïa ki jingkit ba khia jong ki kmie ki kpa khamtam kiba duna ha ka ïoh ka kot ban phah pule ïa ki khun jong ki.
Shuh shuh u la ong ba hadien ba la dep tei ïa kane ka college, ki samla pule kim donkam shuh ban dang ïabeh ban leit pule shabar ryngkat ka jinglut baheh, hynrei kin ïoh ban bteng ïa ki jingpule jong ki ha la ka jong ka jaka, ym da donkam shuh ban leit shabar.
