Shillong, Jylliew 03
U Myntri Rangbah ka Jylla Conrad K Sangma ha ka sngi Balang u la pyntip ba ka Sorkar Jylla ka dang peitngor bha ïa ka jingsaphriang ka khlam sniang African Swine Fever bad kala shim ïa ki sienjam ban tehlakam, haba pynpaw ba kane ka khlam ka dei kaba ju jia man ka por ha Meghalaya.
Haba kren bad ki nongthoh khubor, u Conrad u la ong, “Ha ka jingshisha, kane kala long ka jingeh ha ki snem bala leit noh bad ngi la peitngor bha ïa ka jinglong jingman bad ngi la shim ïa ki sienjam ban tehlakam ïa ka.”
Haba pynpaw ïa ka jingsngewkhia, u Myntri Rangbah u la ong ba kum kine ki jinglong jingman ki mih na ka por sha ka por hynrei u la pynthikna ba ki lad jingïada kila don.
“Hooid, ki don ki jingsngewkhia bad kine ki jingsngewkhia ruh ki ïai jia na ka por sha ka por hynrei ka tnad kala shim ïa baroh ki lad ki lynti bad ki sienjam ban pynthikna ba kane ka khlam kan ym saphriang kylleng,” u la ong.
U Conrad u la bynrap ba tang katto katne tylli ki jingïoh pang ki sniang la pyntip haduh mynta. “Ki don katto katne ki sniang kiba ïoh pang bad ngin leh kat kaba lah ban pynthikna ba kane ka khlam kan ym saphriang ha baroh kawei ka Jylla,” u la ong.
