Shillong, Jylliew 03
Ka jingmynjur ka Sorkar MDA-2 ïa ka kyrteng u James PK Sangma uba dei u hynmen jong u Conrad K Sangma ba un long u kyrtong ka MP Rajya Sabha ka la pynlong ba ïa ki shuki kiba hakhmat jong ka Jylla la bat lut na ki thaiñ Rilum Garo.
Ki kam kiba hakhmat ba ka Rilum Garo ka la ïoh bat ki long ïa ka shuki Myntri Rangbah ka Jylla la bat da u Conrad K Sangma, ïa ka shuki Lamphang uba pynïaid ïa ka dorbar jong ki MLA la bat da u Thomas A Sangma bad ka shuki kum u Nongïalam ka Liang Pyrshah ha ïingdorbar thawain la bat da u Dr. Mukul Sangma.
Ha kane ka kynti kaba mynta kaba dei ka ilekshon MP Rajya Sabha ka NPP ka la jied ïa ka kyrteng jong u James P.K Sangma bad la mynjur lang ruh da ki MLA kiba don ha ka liang synshar kiba kynthup ïa ka UDP, HSPDP, BJP nalor u MLA shimet.
U James PK Sangma u dei u hynmen trai jong u Conrad K Sangma bad uba dei u Myntri barim ka Sorkar Jylla bad uba la shah rem ruh ha ka ilekshon MLA ba dang shu dep ha u 2023 na Dadenggre Constituency.
Katba ïa ka shuki kiba kham hapoh kum u Symbud Myntri Rangbah kata la bat da u Bah Prestone Tynsong na Rilum Khasi bad Bah Sniawbhalang Dhar na Rilum Jaiñtia.
Kumban shu pynkynmaw ba ka jingjied ka NPP ïa u James P.K Sangma ka long ban mih bujli ha jaka u Dr. WR Kharlukhi uba dei u MP Rajya Sabha uba la poi artad sha ka jingkut noh jong ka samoi treikam.
