Shillong, Jylliew 03
Ki nongdie doh sniang ha Ïewduh ki la kyntu ïa ki paidbah ba kim dei ban tieng ban wan thied dohsniang ha Ïewduh namar ïa ka doh kaba la ot ha Mawiong la dep eksamin da ki doktor.
Kane ka jingpynpaw kiba die doh sniang ha Ïewduh ka dei hadien ka jingïap khlam ki sniang hapoh ka Jylla kaba la tip kum ka Africa Swine Fever kaba la buh jingma ïa ki paidbah kiba ju bam doh sniang.
Haba ïakren bad u Bah Khit Lyngdoh Lyngkhoi u la kyntu ïa ki paidbah ba kim dei ban tieng haba ki wan thied doh sniang na Ïewduh namar ka long kaba shngaiñ ïa ki ban bam.
U la ïathuh haba ki nongthied ki wan thied doh sniang ki la batai khnang ba kin sngewthuh namar ka sniang ba wanrah napoh ka Jylla bad nabar jylla ki doktor ha Mawiong ki da eksamin shwa ban die sha ki paidbah.
Shuh shuh u la ïathuh ba tang na Meghalaya ym lah pyndap doh sniang namarkata donkam ïa ka doh sniang ban wanrah na Assam.
U la pyntip biang ba ki doktor ki ju eksamin ïa ki dohnud bad dohjem hadien kata ki sa aiti ha ki trai ban leit die ïa ka doh sha ïew.
U la ïathuh ba haduh mynta ym pat don ki riew paidbah kiba wan ujor ba ka doh ka sniew hynrei baroh ki bha lut.
