Shillong, Jylliew 03
U Symbud Myntri Rangbah ka Jylla Bah Prestone Tynsong ha ka sngi Balang u la ong, ka wat kaba ar jong ka jingïakren pud hapdeng ka Meghalaya bad Assam halor ki 6 tylli ki jaka ba dang sah ha ka jingïakajia pud, kan sa sdang biang tad hadien ynda pyndep ka Assam ïa ka jingpynheh ïa ka kynhun Myntri.
Haba jubab ïa ka jingkylli halor ka jinglong jingman ba mynta jong ki Regional Committee, u Bah Prestone u la ong, baroh artylli ki Jylla ki dang ap ïa ka jingthaw ïa ka Kynhun Myntri ha Assam hashuwa ba ki jingïahiar jurip lang kan bteng.
“Halor ki Regional Committee ba khmih ïa ki jaka ïakajia hapdeng ka Meghalaya bad Assam, ngi dang ap biang namar ka jingpynheh ïa ka Kynhun Myntri ha Assam ka dang ap ban long,” ong u Bah Prestone.
U la pynthikna ba u Myntri Rangbah ka Assam Himanta Biswa Sarma u dang ïai kut jingmut ban bteng bad ïaid shakhmat ïa kane ka kam hynrei ïa mynta u la pan por.
“U Myntri Rangbah ka Assam u la dep pynpaw ïa ka jingkwah ban pynbteng ïa ka jingïakren bad ka jingïajurip lang da baroh ar tylli ki Regional Committee. Hynrei u la kyrpad ïa ngi ban ap haduh ban da pyndep ïa ka jingpynheh ïa ka Kynhun Myntri,” ong u Bah Prestone.
Ka wat kaba ar jong ka jingïakren pynbeit pud ka kynthup ïa ka Langpih, Borduar, Nongwah-Mawtamur, Desh Doomreah, Block-I & Block-II, bad Psiar-Khanduli.
Hynriew tylli na ki jaka ïakajia la dep ban pynbeit ha ka wat kaba nyngkong lyngba ka jingïasoi ïa ka soskular ha u bnai Lber 2022 ha New Delhi ha ka jingïadon ryngkat u Myntri Kam Pohïing ka Ri u Amit Shah.
