Shillong, Jylliew 03
Ka Sorkar Meghalaya kan rah ïakren ban buddien ïa ki mat kiba dang sahteng kynthup ïa ka jingdawa Inner Line Permit (ILP) bad ban pynrung ïa ka ktien Khasi bad Garo ha ka Khyrnit kaba Phra bad u Myntri ka tnad Kam Pohïing ka ri u Amit Shah lada ïoh lad ban pynsngew ha ka jingwan jong u sha Shillong, ong u Symbud Myntri Rangbah ka Jylla Bah Prestone Tynsong ha ka sngi Balang.
Haba kylli hato kan don ka jingïakren ïa ka mat ILP bad u Amit Shah, u Bah Prestone u la ong, ba ka mat ba hakhmat hi ka dei halor ka jingïalang jong ka North Eastern Council (NEC) hynrei ka Jylla ka ïengskhem ban shimkhia bad buddien ïa katei ka mat.
“Ka Plenary Session lashai ka sngi ka dei halor ka NEC, kumta ngin ïa buh ïa kane sharud,” u la ong ha kaba ïadei bad ka 73rd NEC Plenary ka ban long ha ka 3 haduh 5 tarik u Jylliew ha Shillong.
“Ha ka ban shimkhia bad buddien ïa ki mat kiba dang sahteng, na ka liang ka Sorkar, hooid da kaba thikna. Lada ngi ïoh ïa ka lad ban ïakynduh ïa u Amit Shah, ngin pynsngew beit bad ban ïakren ïa ki mat kiba dang sahteng jong ka ILP bad ka jingpynrung ïa ki ktien Khasi bad Garo ha ka Eighth Schedule,” ong u Bah Prestone.
U la pynpaw ba kitei baroh artylli ki jingdawa ki dei kiba la ïoh ïa ka jingmynjur na ka ïingdorbar thawaiñ. “Ngi la dep ban mynjur ïa ka Resolution halor kitei ki artylli ki mat hapoh ka ïingdorbar thawaiñ,” u la ong.
