Shillong, Jylliew 04:
Ka la mih ka jingïania kaba jur hapdeng ki nongleit nongwan bad ki bor District, namar ki pulit ki la pynsangeh ïaid shipor ïa ki kali shuwa ka jingïaid lynti u Myntri Kam Pohïing ka Sorkar Pdeng ha ka jingwan jong u ha Shillong. Kane ka jingkhang ïa ki kali ban ïaid ka long namar ba wan ïaid u Amit Shah ban leit pynïaid ïa ka jingïalang jong ka 73rd Plenary ka North Eastern Council (NEC) kaba la long ha State Convention Centre, Shillong. Kane ka dei kaba la jia ha ka step jong ka Sngi Palei ha ka por kumba 10:30 eiei ha ki bynta jong ka surok ba wan na ki thaiñ FCI ban poi Polo. Na kane ka jingpynsangeh ïaid shipor ïa ki kali ka la mih ka jingbitar kaba jur na ki paidbah ba leit ba wan ha kaba ki la pynrem jur ïa ki bor pynïaid District bad ki la pynsawa ïa ki ‘horn’ kali jong ki katba u Amit Shah u dang ïaid lyngba katei ka surok. Ym tang ha kane ka bynta, hynrei ha kiwei ki bynta jong ka surok ba ïaid u Myntri, ka la mih paw ka jingbitar jong ki paidbah, haba ki la shah khang lynti wat haba ym pat dei ïaid satia u Myntri, hynrei ba la shu khang bad phah weng lut ïa baroh ki kali kiba ïeng harud surok bad wat ban khang ruh ïa kito ki kali bad arshaka kiba leit ban shaw ïa la ki khun na ki skul. Haba la ïohi ïa ka jingdom bad ka jingbitar ki paidbah ha katei ka jaka, ki bor pynïaid District ki la pyrshang ban pynjai-jai ïa ki, da kaba ki la ong, “Ïaishah tang katto katne por bad kyrpad ïa ki paidbah ba kin ai ka jingïatreilang bad ka bor District.” Haba ïoh ïakren ïa ki paidbah ba sahkut bad mad ïa katei ka jingsahkut ki kali kaba la neh kumba shikynta duna eiei, ki la kynnoh ba kam don kano-kano ka jingpyntip ba kan don ka jingkhang ïaid kali bad kane ka jingshah pynsangeh ïaid kali ka la ktah ïa ki, ha kaba don kiba la pynpaw ba ki la slem ban poi sha ki jaka trei jong ki. “Kane ka jingleh ka paw ba tlot ki bor pynïaid, ka long ruh ka jingthombor bad pyndonkam bakla ïa ka bor ba ki don kum kiba bat ïa ka aiñ, kane ka pynsyllang ïa ngi ki paidbah” la ong uwei u ‘riew paidbah. Shuh-shuh ki paidbah ki la ong ba kaei ka jingmut ban khang ïaid ïa ki kali tang namar ba wan ïaid kita ki heh ki haiñ, kane ka jingleh ka ktah ïa ka kamai kajih jong ki paidbah bad pynpaw ba ka la dei ka por ban jied ïa ka jingkylla, “Jied ïa ka jingkylla ha ka ilekshon 2028,” ki la ong.
