Shillong, Jylliew 04:
Ki nongïalam ka Khasi Students’ Union (KSU) ha ka Sngi Palei ki la ong ba u Myntri kam pohïing ka Sorkar Pdeng, u Amit Shah u la kular ïa ka seng ba ka Sorkar Pdeng ka lah ban tuklar ïa ka jingïakajia pud hapdeng ka Assam-Meghalaya lada ki jingïakren ha ka kyrdan jong ki Jylla ki sahkut. U la kular ruh ba shen yn sa thaw noh ïa ka kynhun ki nongbishar ba la shongthait ka Supreme Court ban rai ha ka ban pynrung ïa ka Khasi ha ka Khyrnit kaba 8. Kitei ki jingkular ki la wan lyngba ka jingïakynduh jong u Shah bad ka kynhun ka KSU ha Shillong, hadien ka jingïashim bynta jong u ha ka jingïalang ‘Plenary’ kaba 73 jong ka NEC. Na ka liang u General Secretary ka KSU, samla Reuben Najiar u la ong ba ka seng ka la pynsngew ïa 3 tylli ki mat. Halor ka ILP, ka seng ka la ong sha u Shah ba kane ka ïai long ka “jingdawa kaba la slem bah.” “Ha ryngkat ki jingkyndang kiba jur ha West Bengal bad Assam, ki briew kiba wan buhai shnong be-aiñ kim leit phai shuh sha Bangladesh hynrei ki buhai shnong shawei pat. Ka Meghalaya kam don aiñ ban ïada ïalade. Ka la dei ka por ban pyntreikam noh ïa ka ILP ban ïada ïa ki jaidbynriew ba rit paid jong ki Khasi, Jaiñtia, bad Garo,” ong u samla Najiar. Halor u pud u sam, u la ong ba ka Assam ka la “kylla leh donbor” ha ki jaka ba don jingïakajia. “Ha Lapangap bad shawei, ka Assam ka la long kum ka nongleh donbor, da kaba pynkheiñ ïa ka ‘Status quo’,” la ong u samla Najiar. U Shah u la pyntikna ïa u ba “Lada ka Sorkar Pdeng ka lap ba ka jingpynïaid kam, kam ïaid katkum ki lad ki lynti kiba biang, ka Sorkar India kan tuklar.” Halor ka Khyrnit kaba 8, u samla Najiar u la ong ba u Shah u la pyntikna ba katei ka kam ka la ïaid shakhmat. “Yn sa thaw ïa ka komiti jong ki nongbishar ba la shongthait ka ‘Supreme Court’ ha ki bnai ban wan. Da kumba 100 tylli ki jait ktien kiba kwah ban shah kynthup, ka kynhun kan sa shim ïa ka rai kaba khatduh”, u la ong. Haba kylli la hato ka jingïalang ka long kaba seisoh, une u nongïalam u la ong, “Ka kamram jong ngi ka long ban wanrah ïa ki mat ba ïadei bad ka Jylla. Ka dei ïa ka Jylla bad ka Sorkar Pdeng ban eksamin bad ban pyntreikam.” U la bynrap, “Ka ILP ka la sakhi ïa ki jingïakhih ha kiba bun snem. Ka shong mynta ha ka Sorkar Pdeng ban pynshai balei ba dei ban ai ne ban ym ai ïa ka ILP.” Shuh shuh na ka liang ka KSU ka dang don ka jingkyrmen halor kane ka bynta bad ong, “Ka Manipur ka la ïoh ïa ka ILP ha u snem 2019. Ngi kyrmen ba ka Meghalaya ruh kan ïoh ïa ka ha ki bnai ne ki snem ban wan.”
