Shillong, Jylliew 04:
U Bah Lektor Dkhar, u nongwad Right To Information (RTI) u la leit ban ai jingkyrshan ïa u Bah Marshal Biam, uba la shong shah thngan ha Ladrymbai doh wah. Haba kren sha ki lad pathai khubor u Bah Lektor u la beiñ ïa ki bor district ka East Jaiñtia Hills, ba kim ai lad bad ki la pynmih jubor ïa u Bah Marshal Biam napoh ka phyllaw DC, ban pynlong ïa ka jingshah thngan na ka bynta ban plie dewïong. U Bah Lektor Dkhar u la ong ba katkum ka Construction ka Ri India ha ka Article 19 (1) a bad b, ka ai lad ïa ki nongshong shnong ka ri ban kren laitluid bad ban pynlong jingïakhih ba jai-jai, hynrei ki bor district ki la pynshong ban pynduh ïa kane ka hok jong ki paidbah. U Bah Lektor u la kren shai, ba ka la dei ka por ïa ki paidbah ban ïalap pyrshah ïa ka Sorkar MDA ba lam khmat da ka NPP, namar ka jingthok jingshukor ka Sorkar ïa ki paidbah ha kaba kim lah shuh ban pdiang. Shuh shuh u la ong ruh ba lada ki MLA na Jaiñtia, lada ki don shisha ka jingkit khlieh, ka la dei ka kamram jong ki, ban ïalam ïa u paidbah ban pynlong jingïakhih ba jai-jai, khamtam ïa u Bah Kyrmen Shylla uba ju kren bha ïa kane ka mat dewïong tang lyngba ki social media, ka jingïasaid tang lyngba ka social media, kadei tang ka jingpynbieit ïa u paidbah. U Bah Lektor u la dawa ba lada ka Sorkar kam lah ban plie dewïong, u Conrad Sangma u dei ban hiar shuki lym kumta ki paidbah kin ïa tylli ban ïalap pyrshah ïa ka Sorkar, khamtam ha kane ka por ka Sorkar ka donkam ïa ki paidbah. U la kyrpad ïa baroh ki paidbah jong ka Jylla naduh Khasi-Jaiñtia, ba kin sngewbha ban wan ai jingkyrshan ïa kane ka jingïakhih.
