Shillong, Jylliew 04:
U Bah Robertjune Kharjahrin uba la phah shithi iehnoh ïa ka kam kum u Vice President ka UDP Sengkmie bad kum u dkhot ka UDP haduh ka shnong kaba u shong u sah, um pat shim ïa ka rai shano un leit ban pynïasoh ïalade hynrei un dang shong pyrkhat shwa. Haba ïakren bad u Bah Robertjune Kharjahrin, um kwah ban kren eiei hynrei kumba la paw ha ka shithi ka la pyni ba um don shuh ha ka UDP. Haba kylli biang shano ka seng ba un leit pynïasoh, ka jubab jong u ka long ba um pat rai namar um pat kwah ban kren eiei. Kumban shu pynkynmaw u Bah Robertjune u dei u kyrtong MP Lok Sabha ba la pynïeng da ka UDP ha ka ilekshon ha u snem 2024 hynrei u la shah rem noh bad mynta ka UDP ka la sei da uwei u kyrtong u Bah V.G.K Kynta ban ïakhun ïa ka ilekshon MP shiteng samoi. U Bah Robertjune u la phah ïa ka shithi sha u President ka UDP Sengkmie ban mih noh na ka seng, ka dei ha ka 3 tarik mynta u bnai Jylliew da kaba kdew ba um sngewtynnad ba ki MLA ka UDP kin kyrshan ïa u James K Sangma kum u kyrtong ka MP Rajya Sabha khlem da wanrah ha ka CEC jong ka UDP namar u dei na ka NPP. Ha kane ka shithi u la pynpaw ba kane ka jingkyrshan ka UDP ïa u kyrtong ka NPP ha Rajya Sabha ka la pynkulmar ïa ki paidbah haba ka UDP kaba la sei kyrtong ban ïakhun ïa ka ilekshon MP Lok Sabha ka ban sa long shen.
