Shillong, Jylliew 04:
U Myntri Rangbah ka Jylla Conrad K Sangma ha ka sngi Palei u la aiti ïa ka dorkhas sha u Myntri ka tnad Kam Pohïing ka Ri Amit Shah ban pynbor pyntreikam ïa ki lai tylli ki mat dawa kiba la sahteng la slem, kata ka jingpyntreikam ïa ka Inner Line Permit (ILP) ha Meghalaya, ban pynïoh muhor ka President ïa ka Residents Safety Bill kaba la amend jong ka Jylla bad ban thoh noh ia ka ktien khasi bad Garo ha ka Khyrnit kaba Phra jong ka riti synshar ka Ri. Haba kdew ïa kiba bun ki jingsngewkhia jong ka Jylla, u Conrad u la ong ba ka Jylla ka donkam ïa ki aiñ kaba khlaiñ ban tehlakam bad pyrkhing ïa ka jingwan rung ki mynder-ri hapoh ka Jylla, bad ban ïada ïa ki trai riewlum. Ha ka jingïakynduh bad u Amit Shah ha Shillong, u Conrad ha ka dorkhas ba la aiti u la kdew ïa bun ki jingsngewkhia ka Jylla, kynthup ka jingwan rung beaiñ ki mynder ri, ILP, ka jingithuh ïa ka ktien Khasi bad Garo da ka Riti Synshar ka Ri, ka jingtyrwa ban pynkylla ïa ka Sixth Schedule bad ka jingpynkylla ïa ka Foreign Contribution (Regulation) Act (FCRA). Halor ka jingwan rung ki mynder ri, u Myntri Rangbah u la ong ba ka Meghalaya ka donkam ïa ka aiñ kaba kham treikam bha ban pyrkhing ïa ka jingwan rung ki briew nabar bad khanglad ïa ka jingrung beaiñ ki mynder ri. U la kren halor ka Meghalaya Residents Safety and Security Act (MRSSA) bad ka Inner Line Permit (IL)-kiba baroh artylli la kyrshan da ka resolution ba la mynjur da ka ïingdorbar thawaiñ ka Jylla, ka atiar kaba lah ban pynkhlaiñ ïa ka jingpeitngor bad jingpyrkhing. Ka dorkhas kala kyrpad ruh ban pynrung noh ïa ka ktien Khasi bad Garo ha ka khyrnit ba phra jong ka riti synshar ka Ri, ka jingdawa kaba la sahteng la slem, ka ban pynskhem ïa ka jingithuh kum ka Official Language bad ban pynkhlaiñ ïa ka jingïaleh ban pynneh bad pynriewspah ïa ki ktien tynrai ka Jylla. U Conrad u la kyrpad ruh ïa ka Sorkar Pdeng ban pynlong ïa ka jingïakren bad ki Jylla ka thaiñ Shatei LamMihngi hashuwa ban pynïaid shakhmat bad kano-kano ka jingpynkylla ïa ki kyndon ka Sixth Schedule, haba ban jur ba dei ban pynkhlaiñ ïa ka jingïada ïa ki riewlum bad ka rukom synshar ba laitluid ban ïa kaba pyntlot bor. U Myntri Rangbah u la pynsngew ruh ïa ki jingsngewkhia bala pynpaw da ki seng bapher-bapher haba ïadei bad ka jingpynkylla ïa ka FCRA, khamtam ka kynti kaba lah ban ktah ïa ka jingtreikam jong ki bad ki jingdon jingem. Hadien ka jingïalang, u Conrad u la ai khublei ïa u Amit Shah namar ka jingshah skhor bad pynpaw ïa ka jingkyrmen ban don ka jingmih kaba sngewtynnad halor kine ki mat kiba la pynpaw hakhmat jong u
