Shillong, Jylliew 05
U Secretary ka Ïingdorbar Thawaiñ ka Jylla, u Malthus Sangma ha ka Sngi Thohdieng u la ong ba u kyrtong ka Meghalaya Democratic Alliance-II (MDA-II) bad National Vice-President ka NPP, u James K. Sangma un sa thep kyrteng na ka bynta ka ilekshon Rajya Sabha ha ka 8 tarik Jylliew.
“Ka tarik ba khatduh ban thep kyrteng na ka bynta ka ilekshon Rajya Sabha kan long ha ka 8 tarik Jylliew (Lah Sngi U Blei). U kyrtong ba la kyrshan na ka NPP u la kwah ban wan thep kyrteng mynta ka sngi, hynrei kumno-re-kumno nga la ïoh jingtip ba ki dang hap ban pynkhreh ïa katto-katne ki kot ki sla,” la ong u Sangma haba kren sha ki nongthoh khubor.
“Ki don katto-katne ki kot ki sla kiba hap ban pynkhreh. Ki don ki ‘affidavit’ kiba donkam ban ai jingbit. Kumta, ki don katto-katne ki kot ki sla ki bym pat biang, kumta kin sa wan ha ka Lah Sngi U Blei ha ka por 11 baje mynstep,” u la bynrap. Ka jingthep ‘Vote’ kan long ha ka 18 tarik Jylliew naduh ka por 9 baje mynstep haduh ka por 4 baje janmiet, bad ka jingñiew ïa ki ‘Vote’ kan sdang naduh ka por 5 baje janmiet ha kane kajuh ka sngi.
Ka Election Commission of India (ECI) ka la pynbna ïa ka por ban pynlong ïa ka ilekshon ba man ka ar snem sha ki 24 tylli ki shuki ka Rajya Sabha ha ki 10 tylli ki Jylla.
Ka ilekshon ka la long kaba donkam namarba ka samoi treikam jong ki 24 ngut ki dkhot jong ka ‘Council of States’ kan kut noh ha u bnai Jylliew-Naitung, 2026.
