Shillong, Jylliew 05
Ki nongïalam ka NPP na ka thaiñ Mawsynram, Mawphlang bad Ranikor ki la pynsngew ha u Myntri Rangbah ka Jylla u Conrad K Sangma ha kaba ïadei ka jingaiti ïa ka kompeni SAI Com-puter Limited ban sam bording.
Kine ki nongïalam kiba kynthup ïa u MDC uba dei ruh u President ka NPP Mawsynram u Bah Alvin Sawkmie, Bah Auspicious L Maw-phlang President NPP Mawphlang Block Com-mittee, Nelbi T Sangma, President NPP Ranikor Block Committee, Bah HM Shangpliang Adviser NPP Mawsynram, Lam-phrang Blah Adviser NPP Mawphlang, Kitbor -lang Nongrem State Secretary NPP South West Khasi Hills, bad kiwei-kiwei, ki la kyrpad ïa u Myntri Rangbah ba un peitbniah biang lane pynkut noh ïa ka jingaiti ïa ka SAI Computer Limited ban sam bording ha ka thaiñ Mawphlang, Mawsynram bad Ranikor Block bad ban pynïaid hi ka MePDCL.
Kane ka jingdawa jong ki na u Myntri Rangbah kadei na ka jingbym shaniah ki nongshong shnong ïa kane ka kompeni.
Ki paidbah nongshong shnong kine ki thaiñ ki la pyrshah namar ba kim ïoh jingmyntoi shuh kum ka skhim RDSS kaba ki ïoh mynshwa haba sam bording hi ka Sorkar. Nangta ka jingkiew palat ka bai bording ha Mawsynram Block ban ïanujor bad kiwei pat ki Block ba treikam da kane ka juh hi ka kompeni.
Ha ka jingthoh ba la phah sha u Myntri Rangbah kine ki nongïalam ki la pynpaw ba bun ki Dorbar Shnong kim shym la ai NOC ïa kane ka Kompeni lane ïatreilang bad kane ka kompeni namar ka jingbym sngewhun ki paidbah ka ba lah ban wanrah ka jingleh shiliang ka jingtreikam kane ka kompeni.
Nangta kane ka kompeni kam shym la pynurlong ïa ki jingpynsngew ki Dorbar Shnong bad ki nongshong shnong ban buh ïa ki Post ilektrik lane ban pynthymmai bad ban maramot man ka por ïa ki jaka pynïaid bording.
Shuh shuh ki la pynpaw ba ki nongtrei jong kane ka kompeni kim ju nang ban kren ka ktien ka thylliej ïa ki paidbah hynrei ki ju kren ïa ki kyntien kiba khor bad bym suidniew ïa ki.
Kane ka kompeni ka la mudui pyrshah ruh ïa ki Dorbar Shnong ki bym shym la ai NOC, kumta kane ka jingleh ka nang pynsniew ïa ka jingïadei hapdeng ki paidbah bad ki nongshong shnong ka thaiñ.
Kumta kine ki nongïalam ka NPP jong kine ki thaiñ ki la kyrpad ïa u Conrad ba un sngap ïa kine ki jingdawa jong ki bad ban aiti biang sha ka MePDCL ban sam bording khnang ba ki paidbah kin ïoh ka jingshaniah ïa ki rukom synshar ha kine ki thaiñ.
