Shillong, Jylliew 05
Hadien katto katne sngi ba ki kmie ki kpa jong ki khynnah ba pule ha Shillong Public School, Shillong ki la pynpaw ïa ka jingbitar namar ka jingbym ïoh ki khun jong ki ban ïalehkai ha ka madan skul hadien ba la pynthymmai ïa ka, ka Directorate of School Education & Literacy ka la khot jingïalang ïa ki kmie ki kpa ki khynnah skul ban ïa pyrkhat bha ïa kane ka mat.
Ïa kane ka jingïalang la pynïaid da u Bah B.J kharshandi, Director ka DSE&L ha ka shlem treikam jong u kaba don ha Laitumkhrah, Shillong.
Haba kren sha ki nongthoh khubor hadien ka jingïalang ki kmie ki kpa jong ki khynnah skul ki la pynpaw ba ki sngewhun namar ka jingïalang ka long kaba seisoh, ha kaba na ka liang u Director u la pynshai ba ka la don ka jingïa pynbeit da ka por khnang ba ki khynnah kin ïoh ban ïalehkai kumba ka long ha ki por ba la dep.
Shuh-shuh ki la ïathuh ba ki la ïoh ka jingpynshai ba ka jingbym ïoh ïalehkai ki khynnah ka long namar ba donkam ban pynbiang ïa ki juti ïalehkai bol ka ban long ka jingïada ïa ki khynnah na kano-kano ka jingma.
Ki la ïathuh ruh haba ïadei kane, na ka liang u Director u la pynshai ba ka tnad kan sa pynbiang ïa ki jingdonkam ki khynnah haba ki ïalehkai bad ka jingtei pynbha ïa katei ka madan ruh ka dei na ka bynta ka jingmyntoi jong ki khynnah.
U Bah Tony Jana uwei napdeng kiba mihkhmat kum ki kmie kpa ki khynnah skul ha katei ka jingïalang, u la pynpaw ba ki kyrmen ba ki khun jong ki kin ïoh ban ïalehkai ha katei ka madan naduh ka sngi nyngkong jong ka taïew ban wan.
U Bah Jowel Mawroh u ba dei u dkhot jong ka Tynrai Group u la ïathuh ba ki la shimwai ïa katei ka madan 10 snem bad pynpaw ba naduh ba sdang ka la don ka jingpynbeit ba ki khynnah skul kin ïoh ban ïalehkai naduh ka por 7 baje mynstep haduh ka por 3 baje nohphai sngi bad pynshai ba ki khynnah ki donkam ban phong da ki juti ba lehkai ha ki madan Futsal ba kan ym don kano-kano ka jingma ïa ki.
