Shillong, Jylliew 05:
U Waheh chnong ka Lapangap, West Jaiñtia Hills Bah Deimon Lyngdoh u la ïathuh ba ka jingïohlad biang ki paidbah ka shnong Lapangap ban leit rep biang ha ki lyngkha ka dei hadien ba ki paidbah Karbi ki la kohnguh ïa ka jingai jingbit u Chief Executive Member ka Karbi Anglong Autono-mous District Council (KAAC) kaba la long ha ka 2 tarik mynta u bnai.
U la ïathuh ba katkum ka jingïohi jong u ba hadien ka jingkren u Tuliram Ronghang uba dei u MLA bad CEM ka KAAC, ki paidbah Karbi kiba sah ha khappud bad ka Lapangap ki la kohnguh namar ki la pynpaw ba kaei kaba u khliehduh ka KAAC u la ong ma ki ruh ki ngeit beit.
U Bah Deimon u la pyntip ba naduh ka 3 tarik mynta u bnai ki nongshong shnong Lapangap ki la sdang ban leit rep khlem don shuh ka jingshah pyndik ha ki Karbi.
Shuh shuh u la ïathuh ba ki pulit na Meghalaya ruh ki la synranlang ïa ki nongrep naduh ka por 8:30 mynstep haduh ban da wanphai ha ka por 5:00 baje janmiet.
U la pyntip ruh ba ym tang ki pulit Meghalaya kiba synran ïa ki hynrei ki don lang ruh ki pulit Assam ruh.
“Naduh ba la shah ban leit rep ngi la sdang ban puh ïa ki hali bad mynta u bnai ngi dei ban pyndep ban thung ïa u kba, katba kiba thung kba lum kim ïoh lad shuh namar ka por kam ïahap shuh” u la ong.
U la pynkynmaw ba ha katei ka jingïalang kiba na Tahpat ki kyntu ïa ka Sorkar ban thung noh da ki dieng kiba neh shirta hynrei kiba na Lapangap ki kwah ban thung ïa ki mar rep kiba long ban bujli man ka aiom.
Ha ka juh ka por u la ong ba la kane ka jingïasuk kan neh shirta ne kan nym neh shirta um nang ban batai namar ym tip ha kano ka por ki Karbi ki lah ban kylla ktien.
