Shillong, Jylliew 05
Ka ophis treikam ka Commissioner for Persons with Disabilities Social Welfare Depart-ment, ka State Council of Science, Technology & Environment Meghalaya, Shillong & Pt bad Deendayal Upadhyaya National Institute for Persons with Physical Disabilities (PDUNIPPD) ha ryngkat ka jingïatreilang bad ka Instalimb India Pvt Ltd, ha ka 05 tarik Jylliew, 2026, ka la pynlong ïa ka prokram sam tiar jingïarap ka Fitment of 3D Printed Prosthesis (ARTIFICIAL LIMBS) to Persons with Disabilities and Cre Programme For Prosthetic-Orthotic (P&O) Professionals of North East India, ha State Central Library, Shillong.
Kane ka sienjam ba la leh, ka long kum shibynta ban ai ka jingïarap sha ki briew kiba duna ha ki dkhot met, ban ai ka jingïarap sha ki. Ha kane ka sngi, la wan ban ïashim bynta da u Bah Sanbor Shullai, Myntri ba dei khmih ïa ka tnad Arts and Culture uba long kum u Kongsan, ha ryngkat ka jingïadonlang u Pravin Bakshi, Commissioner & Secretary ka Sorkar Jylla, u Bah Lyngkor Kynjing, MCS, Commissioner for Person with Disabilities ka Sorkar Jylla bad kiwei-kiwei de.
Ha kane ka sngi, la sam ïa ki 3D PRINTED artificial limbs sha khat-ar ngut ki briew kiba don jingduna ha ki dkhot met. Haba ai jingkren ha ka jingïalang, u Bah Sanbor Shullai, u la ong ba ka jingsam ïa ki tiar jingïarap sha ki briew kiba duna dkhot met, ka long shisha ka jingïarap na bynta kiba donkam.
Kumta u la ai ka jingïaroh ïa ki tnad treikam kiba la don bynta ha kane ka kam ai jingïarap sha kiba duna dkhot met. U la ong ba kane ka sngi ka long kaba sah jingkynmaw, namar ki kam ba kongsan kaba ki tnad ka Sorkar ki la leh na bynta ki briew kiba donkam ïa ki jingïarap. U Bah Sanbor u la ïaroh ïa ka tnad Person with Disabilities bad ïa ka Social Welfare, ba ki la leh ïa kane ka kam ban ai jingïarap ïa kiba donkam, da kaba kyntu ba kim dei ban klet ba kano-kano ka jingshakri kaba ki leh ïa ki paidbah ba donkam, kadei ka jingshakri ïa u Blei. U Bah Sanbor u la ïathuh ruh haba ïadei bad ka jingïaid lynti jong u, da kaba ong “La saw sien u la jop ïa ka ilekshon MLA na Laban Konstitwensi bad lada u shu thiah noh ha ka ilekshon ban wan ruh un sa jop beit hi”.
“Ka thong jong nga naduh ba nga dang rit, ka long ban shakri ïa ki paidbah bad ka motto jong nga ka long “Ka jingshakri ïa ki briew, kadei ka jingshakri ïa u Blei,” la ong u Bah Sanbor.
Shuh shuh u la ïathuh shaphang ka jingim jong u ha ka por ba u dang khynnah, ba u wan na ka longïing kaba duk da kaba sah ha ka ïingwai, ba don tang 2 kamra hynrei da ka jingtrei shitom da ka jingkohnguh ïa ki kmie ki kpa bad ka jingburom ïa kiba la heh la san, ka pynlong ïa u ban long kumne kumba u long mynta.
Namarkata, u la ai nuksa ruh ïa u Dr. Rajendra Prasad, u Abdul Kalam bad u Myntri Rangbahduh ka ri u Narendra Modi, kiba wan na ka longïing kaba duk, hynrei ki kylla long ki nongïalam ba ratbah jong ka ri.
