Shillong, Jylliew 05
Ka Sorkar Jylla ka la wanrah haduh 1 lak hectare ka jaka hapoh ka prokram ïada bad peit thuh ïa ka Mariang lyngba ka prokram Afforestation and Payment for Ecosystem Sevices, ong u Commissioner & Secretary ka tnad Tourism, Vijay Kumar, ha ka jingrakhe ïa ka World Environment Day 2026 ha ka Sngi Thohdieng.
Haba kren ha Maw-rah, East Khasi Hills, u Kumar ula kren halor ka jingkiew shakhmat ka Jylla ha ka kam ïada Mariang bad ka roi ka par kaba neh bad ong ba ka jingriewspah ka Meghalaya ha ka jingdon ïa ki khlaw ki btap bad ki jingthaw ba im ka la pynlong ïa ka kam ïada Mariang kaba kongsan na ka bynta ka lawei jong ka.
U ïathuh ba ha kine ki san snem ba la leit, ki kam thung dieng ki la ïaid jan kumba 25,000 hectare bad sa 14,000 la buh thong ban leh mynta u snem. “Kane kan wanrah ïa kumba 40,000 hectare baroh lang hapoh ka prokram thung dieng bad ïada Mariang” u la ong.
Haba pynbna ïa u Mawmer ba kongsan, u la bynrap ba na ka jingwanrah lang ïa ka prokram Afforestation bad Payment for Ecosystem Services, la lah ban wanrah hapoh 1 lak hectare ka jaka hapoh ka prokram ai jingïada bad jingpeit thuh Mariang. U la ban jur ïa ka jingshim bynta lang jong ki Tnad Sorkar bapher-bapher halor ki jingsumar bad pynneh pynsah ïa ka Mariang. “Ki Tnad Sorkar bapher-bapher ki la synñiang lang ha ka liang ka jingpynneh pynsah ïa ka um, pynneh pynsah ïa ka khyndew, ka Eco-tourism, ka jingïada ïa ki jingthaw ba im” u la ong.
