Shillong, Jylliew 05
U Myntri ka Sorkar Pdeng uba dei peit ïa ka tnad ka koit ka khiah, u JP Nadda ha ka sngi Thohdieng jong ka taïew ha ryngkat ki nongïalam jong ka BJP Meghalaya, ki la pynlong ïa ka jingthung dieng ha Golflinks, Shillong, kum shi bynta ban rakhe ïa ka ‘World Environment Day’.
Haba kren bad ki nongthoh khubor u JP Nadda u la ong ba ka jingpynlong ïa ka jingthung dieng, ka long ha kylleng ka ri hapoh ka jingïalam jong u Myntri Rangbah ka Ri, u Narendra Modi, uba la sdang ïa ka ‘Ek Ped Maa Ke Naam’ ne ‘One Tree for Mother’.
U la ïathuh ba da ki klur ngut ki nongkyrshan ka BJP na kylleng ka ri, kin ïa shim bynta lang ban thung dieng ha kane ka sngi bad ban ai jinghikai ruh ïa kiwei, ban pynneh pynsah ïa ki khlaw ki btap.
U JP Nadda u la ong ruh ba kane ka jingsdang ka wan rah ïa ka khubor kaba jylliew bha bad wanrah ïakata ka jingieid kaba khlem kut jong ka kmie bad ki kyndon jong ka mei mariang ban pynneh pynsah ïa ka.
U la bynrap ruh da kaba ong “Kane ka jingai jinghikai kan ai mynsiem ïa ki paidbah ban ithuh ïa ka jingdonkam ban pynneh pynsah ïa ka mariang, na ka bynta ka lawei ban wan”.
U Myntri ka Sorkar Pdeng u la pynpaw ïa ka jingkyrmen, ba kum kine ki prokram, kum ka ‘Ek Ped Maa Ke Naam’ kan long ka lynti kaba don kam bha bad dei ban pynheh shuh-shuh ïa ka ha kylleng ka ri.
“Kane ka jingsdang ban thung dieng ha ka ri, ka la nang kiew kumba 1.1 lakh hectare man ka snem,” la ong u Myntri ka Sorkar Pdeng.
Namarkata, u ong ba lyngba ka jingïohi jngai jong u Myntri Rangbahduh ka ri, u Narendra Modi, ka ban pynneh ïa ka mariang, ka India ka thrang ban wanrah ïa ka khuid ka suba, ka mariang ba jyrngam, bad ban pynneh pynsah na ka bynta ka lawei ka ban sa wan.
