Shillong, Jylliew 05
U National Vice-President ka NPP bad MLA barim ka Dadenggre, u James K. Sangma u la iehnoh ïa ka kam kum u Chairman ka Meghalaya Industrial Development Corporation Limited (MIDC).
Kane ka jingiehnoh kam jong u ka long hadien ba u la shah jied kum u kyrtong ka Meghalaya Democratic Alliance – II (MDA-II) na ka bynta ka ilekshon Rajya Sabha ha ka 18 tarik u Jylliew.
Haba pynbna ïa kane ka rai ha ki rynsan lad pathai ha ka Sngi Thohdieng, u Sangma u la ong ba u la aiti ïa ka shithi iehnoh kam jong u ha ka Sngi Palei, da kaba ñiew ïa kane ka kam kum “ka burom kaba hakhlieh duh”.
U la pynpaw ruh ka jingsngewnguh kaba khraw sha u Myntri Rangbah ka Jylla, u Conrad K. Sangma na ka bynta “ka jingshaniah kaba u la don ha nga,” da kaba kdew ba ka jingïalam jong u Myntri Rangbah ka long “ka lad ai mynsiem kaba skhem” ha ka por ka samoi treikam jong u.
Na ka liang u Sangma u la ai khublei ruh ïa ka Board of Directors ka MIDC, ki ophisar, bad ki nongtrei, da kaba batai ïa ka por jong u bad ki kum “kawei na ki jingïakynduh kaba riewspah tam ha ka jingtreikam jong nga.” Haba ban jur ïa ka kamram jong ka MIDC ban pynsted ïa ka jingpynroi ïa ki kam karkhana, ban kyrshan ïa ki MSME, bad kumta ter-ter, u Sangma u la ong ba u bynshet ïa ka jingkitkhlieh “da ka jingsarong kaba khraw.”
“Nga iehnoh ïa kane ka shlem treikam da ka jingshaniah kaba pura ha ki briew jong ka bad ka jingthmu jong ka,” u la thoh bad bynrap, “Nga dang ïaineh skhem bad minot haba phai sha ka jingkiew bad jingroi jong ka Jylla jong ngi, ha kano-kano ka kyrdan ba la khot ïa nga ban shakri,” u la ong.
