Shillong, Jylliew 05
U MLA na Pynthorumkhrah Konstitwensi, u Bah AL Hek u la ïathuh ba ka party Bharatiya Janata Party (BJP) kam pat rai ïa u kyrtong ban ïakhun ïa ka ilekshon shiteng samoi sha Lok Sabha na Shillong Parliamentary Konstitwensi.
“Bun kiba la pynpaw ïa ka jingthrang ban ïakhun ïa kane ka ilekshon shiteng samoi na ka BJP,” la pynpaw u Bah AL Hek haba kren sha ki lad pathai khubor ha ka sngi Thohdieng jong ka taïew.
U Bah AL Hek u la pynpaw ba ki don haduh khyndai ngut ki nongïalam ka seng, kiba thrang ban ïakhun ïa kane ka ilekshon bad ka seng shen kan sa lum ïa ka jingïalang, ban ïakren, ïano yn ai tiket na kine kiba pan.
“Ngim pat shym la rai ïa ka kyrteng jongno ngin phah kum u kyrtong. Ka seng shen kan sa ïakynduh bad shim ïa ka rai jong u kyrtong ka BJP, u ban ïakhun ïa kane ka ilekshon shiteng samoi na Shillong Parliamentary Konstitwensi,” ong u Bah AL Hek.
Haba jubab ïa ki khubor hamsaïa, ba yn don ki ban wan rung thymmai sha ka seng, u Bah AL Hek u la ong, ba ka seng ka plie ïa ka jingkhang bad ka pdiang sngewbha ïa ki, lada ki thrang ban pynïasoh bad ka BJP. Hynrei u la ban jur da kaba ong, ba ka rai kaba khatduh kan dei ïa u kyrtong uba don ka jingkyrmen, ban jop ba un mih khmat ïa ka seng ha kane ka ilekshon.
“Uno uno u lah ban pan tiket. Lada mano-mano kiba pynïasoh bad ka BJP, ngi pdiang sngewbha ïa ki, ha kaba kut ka seng kan sa rai ïa uba ibit bad uba don jingkyrmen ban jop,” u la bynrap.
