Shillong, Jylliew 05
U khlieh nongïalam ka UDP bad Myntri Sorkar, Bah Metbah Lyngdoh ha ka Sngi Thohdieng u la pyntikna ba ka seng ka la pdiang ïa ka jingiehnoh kam jong u Bah Robertjune Kharjahrin, u kyrtong ka Regional Democratic Alliance (RDA) ha ka ilekshon Lok Sabha, 2024.
U Bah Lyngdoh ha kajuh ka por, u la kyntait ruh ïa ki jingkynnoh ba ka don ka jingïapait-ïapra hapoh ka seng.
“Baroh ki don ka jinglaitluid ban pyrkhat katba ki mon. Nga kwah ruh ban pynshai ïa kino-kino ki jingartatien ki bym pat shai ha ka jingmut jingpyrkhat jong ki briew,” la ong u Bah Lyngdoh haba jubab halor ka jingmih noh jong u Bah Kharjahrin.
“Ngi la ïoh pdiang ïa ka shithi iehnoh kam jong u da kaba kdew ïa ki daw. Na ka liang ka seng, ngim don eiei shuh ban ong. Ngi burom ïa ka rai jong u bad ngi la pdiang ïa ka jingiehnoh kam jong u,” u la bynrap.
U Bah Kharjahrin u la ïakhun ïa ka ilekshon sha ka Shillong Lok Sabha kum u kyrtong ka RDA hynrei um shym la poi sha ka thong.
Na ka liang u Bah Lyngdoh u la kyntait ruh ïa ka jingkynnoh ba don ka jingïapher jingmut hadien katei ka jingiehnoh kam.
“Kam don kano-kano ka jingïapait-ïapra hapoh ka seng. Kumba nga la ong, ngi la ïoh pdiang ïa ka shithi iehnoh kam jong u, kumta ngam ïohi ïa kano-kano ka jingïapher jingmut hapoh ka seng. Ngam ïohi eiei kaba kum kata,” u la ong. Halor ki jingsngewkhia ba la pynpaw da ka UDP Shillong City District Unit, u la ong ba ïa ki kam jong ka seng dei ban pynbeit hapoh ïing.
“Baroh ki don ka hok ban pynpaw ïa ki jingsngew ne ki jingsngewkhia jong ki haba ïadei bad ki rai jong ka seng. Ka don beit ka rynsan ha ka seng na ka bynta ban ïakren, ban ïasyllok, bad ban ïamir jingmut halor kano-kano ka mat ba ïadei bad ki kam jong ka seng,” la ong u Bah Lyngdoh. U la pyntikna ruh ba ka shithi na ka Shillong City Unit ka la lait tuh hynrei u la ong ba la pynbeit pat ïa kane ka jingeh.
“Ka shithi kaba phi la kdew ka dei na ka UDP Shillong City bad ka la lait tuh, na kano-kano ka tyllong,” u la ong.
“Hynrei kane ka dei ka kam poh ïing jong ka seng. Ngi la pynbeit ïa ka. Nga la ïakynduh hi da lade ïa ka Shillong City Unit bad ngi la dep pynbeit lut baroh,” u la ong.
