Shillong, Jylliew 05
U Myntri ka tnad ka koit ka khiah ka Sorkar Pdeng, u Jagat Prakash Nadda ha ka Sngi Thohdieng u la pynïaid ïa ka jingïalang Parlia-mentary Consultative Committee (PCC) jong ka tnad ha Courtyard by Marriott, Shillong.
Kane ka kynhun kaba la ïadon bynta lang da ka Myntri Khynnah ka tnad ka koit ka khiah ka Sorkar Pdeng, ka Anupriya Patel, ka la ïakren halor ki prokram ba ïadei bad ka koit ka khiah jong ki khynnah ha India bad ki lad ki lynti ban pynbha ïa ki polisi kiba ïadei bad kane ka bynta.
Ha kane ka jingïalang la ïashim bynta ruh da ki MP ka Lok Sabha, u Dr. C.N. Manjunath, Dr. Sanjay Jaiswal, Rajabhau Parag Prakash Waje, Satish Kumar Gautam, Brijendra Singh Ola, Anoop Pradhan, bad Dr. Sharmila Sarkar; ki dkhot ka Rajya Sabha ba kynthup ïa ka Dr. Kalpana Saini, Haris Beeran, Dr. Parmar Jashvantsinh Salamsinh, Dr. Radha Mohan Das Agarwal, Renuka Chowdhary, bad Rajathi.
Ha kane ka sngi la ïadonlang ruh ka Secretary ka tnad ka koit ka khiah ka Sorkar Pdeng, ka Punya Salila Srivastava, Secretary ka Health Research bad Director General ka ICMR, Dr. Rajiv Bhal, bad Director ka NEIGRIHMS, Prof. Nalin Mehta.
Hadien kata, ka komiti ka la leit jngoh ïa ka NEIGRIHMS ban khmih bniah ïa ki jingtei jong ka ‘Hospital’ bad ki jingshakri ha ka liang ka koit ka khiah jong ki khynnah. Ki dkhot ki la jurip ruh ïa ka OPD bad ‘Ward’ jong ki khynnah – ïakren bad ki nongpang, bad pynpaw ïa ka jingsngewhun halor ka jingsumar kaba la ai.
Kum shi bynta jong ka jingrakhe ïa ka sngi pynneh-pynsah mariang ha kylleng ka pyrthei, ka kynhun ka la pynlong ïa ka jingthung dieng ha NEIGRIHMS, ha ryngkat ka jingkyrshan ïa ka phang pdeng jong u snem 2026, “Inspired by Nature. For Climate. For Our Future.”
U Prof. Mehta u la ñiew ïa kane ka jingïalang bad jingwan jngoh “kaba jop” bad u la ong ba ka NEIGRIHMS ka shimkhia ban pynkhlaiñ ïa ka jingsumar ïa ki khynnah ha ka thaiñ kum ka ‘Tertiary Care Institute’.
Ha kane ka sngi la don lang ruh u Medical Superintendent, Sr. Prof. Suvamoy Chakraborty lem bad kiwei-kiwei ki nongtrei.
