Shillong, Jylliew 05
Ka tnat Khlaw (Forest) ryngkat ka jingtreilang bad ka District Legal Service Authority (DLSA) ka Ri Bhoi District, ki la pynlong da ka jingrakhe ïa ka Sngi tyngkai Mariang lane ka World Environment Day, ha kaba la thung palat 500 tylli ki tynrai dieng ha ki rud surok ka shnong ka Nongthymmai, Umsning.
Ha kane ka prokram ka Kong I Lyngkhoi kaba bat ïa ka kam kum ka Secretary District Legal Service Authority, Ri Bhoi District, ka la ïashim bynta shitrhem ban thung dieng bad ki nongshong shnong jong katei ka shnong bad ka phang pdeng jong katei ka prokram ka long “Inspired by Nature, For Climate, For Our Future” lane ka jingpynshlur ban sumar ïa ka Mariang, na ka bynta ka Suiñbneng, na ka bynta ka lawei jong ngi.
Ha kane ka prokram la donlang ruh u DFO, u Pawan Khade, IFS, uba long ruh u Director ka State Zoo, u Assistant Conservator Forest, u Bah S Mawlong, MFS, ka nonghikai na Nehru Memorial HR Sec School, ka Kong A Suting, u Rangbah Shnong Nongthymmai, u Bah M.M Nongshli, ki riew rangbah na ka shnong, ki khynnah skul na Nehru Memorial Secondary School Umsning, ki khynnah skul ka Govt LP School Nongthymmai, ki nongshong shnong bad kiwei-kiwei.
Haba kren halor ka phang jong ka sngi tyngkai Mariang, ka Kong I Lyngkhoi ka la pynpaw ba kano-kano ka bynta kum ka jingpynjulor ïa ka Mariang ka don ka aiñ ban tehlakam bad don ruh kiba la shah pynshitom haba lap ba ki pynkheiñ aiñ, ha kajuh ka por ka la sneng la kraw ruh ïa ki khynnah skul bad ki nongshong shnong ba kin ïaleh katba lah ban pynneh pynsah ïa ka jingjyrngam ka Mariang.
