Shillong, Jylliew 05
Ka Executive Committee ka Dorbar Shnat Raid Ryngi lem u Lyngdoh ka Raid Mawshai, Hima Khyrim Syiemship ka la pynmih jingpynbna ba ki jaka puta hapoh u pud u sam ka Shnat la ka dei ka khyndew Raid ne khyndew shimet, ki dei ki bynta jong ka Shnat ban peit ban khmih, kaba la pynlong ïa ki nongshong shnong ka Umkhoi ban ym sngew ïahap satia ïa ka.
Kumta halor kane ka phang, u Rangbah Shnong ka Umkhoi, u Bah Dretstar Songthiang, u la lum da ka jingïalang ha ka 05 tarik u Jylliew, 2026 ha katei ka shnong ban sngap ïa ka sur na ki nongshong shnong bad kiba don jaka puta hapoh u pud synshar shnong.
Kum ban shu kdew ka Shnat Raid ha ka 20 tarik u Jymmang 2026 ka la shim ïa ka rai ba yn ym don ba lah ban die jaka puta khlem ka jingtip lang ka Shnat Raid Ryngi bad ïa ka khyndew Raid ruh yn ym don mano-mano ba lah ban die ne ai sngewbha la ka dei sha ka Sorkar ne kompeni khlem ka jingmynjur bad jingai jingbit lang.
La ong ba kiba don jaka shimet ne jaka rep ha Raid Ryngi ki dei ban leit sha u Sordar Raid ban pynthikna bad tip shai la ka dei ka khyndew shimet ne khyndew Raid khnang ban lait ka jingdie tuh ïa ki jaka, da kaba kdew ba ki don baroh 13 tylli ki shnong hapoh ka Shnat Raid Ryngi. Halor kine ki jingpynbna ki nongshong shnong bad kiba don jaka ha katei ka shnong ki la ong ba kim ïahap satia ïa katei ka rai ka Executive Committee Dorbar Shnat Raid ba ki khyndew shimet bad nongmei nongpa yn mushlia noh da ka Raid.
Ki nongshong shnong bad kiba don jaka ha katei ka shnong ki la ong ba ki nongïalam ka Raid ki ïohi ïa ka jingwan ki kam pynroi bad kumta ki sdang tuklar ïa ka rukom bat khyndew ha ka shnong.
Ki la ong ba baroh shi katta kam ju don ka jingtuklar da ka Raid ïa ki khyndew ïoh pateng na ki meiieid meidot ne kiba thied na kiwei pat ki para nongshong shnong, hynrei kumba long mynta kim lah sngewthuh ïa ka jingmut ki nongïalam ka Raid.
Ha shuwa ban pynkut noh ïa ka jingïalang u Rangbah Shnong u la ong ba ka rai ki nongshong shnong bad kiba don jaka ha Umkhoi ka dei kaba khatduh. U la ïathuh ba mynshwa ki nongïalam ka Shnat Raid ki khynñiat sha ki bor shnong ban pynbeit ïa ki jaka puta bad kum ka shnong hi ka pyntip sha ka Raid bad kim ju mushlia eiei. Ki nongshong shnong bad kiba don jaka ha Umkhoi ha kane ka jingïalang ki la pynlong ruh ka jingpyrta pynrem ïa ki nongïalam ka Shnat Raid ha katei ka rai ba ki la shim.
