Shillong, Jylliew 07
Ha ka janmiet jong ka 05 tarik u Jylliew 2026, ki dkhot ka Khasi Studens Union (KSU) South East Central Circle, Pynursla ki la ïoh ban bat ïa ar tylli ki trok bad kawei ka Supper Garry kit masi ha surok pyrshah ka ophis barim u SDO Pynursla Civoil Sub-Division ha Pynursla.
Kine ki kali ki dangwan na ki thjaiñ Laitlyngkot bad ïeng ha katei ka jaka bad la ong ba kam don ka jingjubab kaba shai ba shaei kitei ki kali kin leit buh ïa kitei ki masi, watla ka jingsuba jur ka don, ba ki thmu leit buh sha ki jaka khappud bad ban pynrung khaii tuh sha ri Bangladesh.
Kane ka la pynlyngngoh ïa ki nongïalam bad ki dkhot ka KSU ha katei ka thaiñ namar katkum ka Public Notice na ka ophis u SDO ka Pynursla Civil Sub-Division kaba 21 tarik u Jymmang 2026, kaba dang treikam haduh mynta ka la kdew shai, ba ki sngi Balang, sngi Palei, sngi Thoh-dieng bad sngi U Blei, kidei kiba ym shah ïaid kali na Laitlyngkot sha Pynursla.
Katkum katei ka hukum, ba la hukum pyntreikam naduh ka 25 tarik u Jymmang 2026, la ong ban a ka bynta ka jingshngaiñ bad ba ka jingtrei ïa ka lynter surok narum Laitlyngkot sha Lyngkyrdem, kan ïaid kali tang da ka por, kata ha ka sngi Nyngkong, sngi Ba-ar bad sngi Balan, ha kaba la kdew shai pat ban khang naduh ka por 11 baje mynstep haduh ka 3 baje nohphai sngi.
Hynrei la kdew shai pat ba ki sngi Balang, sngi Palei, sngi Thohdieng bad sngi U Blei, kidei ki sngi bym shah ïaid kali bad bynrap ba ka jingïaid kali ha ka por mynmiet ruh la khang, ong ka hukum ba la soi da u Bah G Warjri, MCS Additional Deputy Commissioner, ba dei peit ha Pynursla Civil Sub-Division, Pynursla.
Kane ka bynta surok ha ki taïew ba la dep, ka la don hapdeng ka jingtwa maw jingtwa khyndew ba shyrkhei bad kaba la shim ruh ïa ki mynsiem briew, khlem da ïakren ïa ki jingjulor ki kali namar ka jingtrei kaba long shi bynta ka projek shna surok na Shillong sha Tamabil.
Ka Public Order ka ong, ba na ka jingslap jur ki nongïaid nongïeng na katei ka bynta surok kin hap long husiar bad bteng ba ka jingpynbeit thymmai kan sa don ynda la shong ïa ka Review Meeting kaba bud.
Ha kaba ïadei bad ka jingïoh bat ïa kitei ki kali kit masi, ka KSU ka pynpaw, ba ka long ka jingsngewkhia ïa ki mynsiem briew, lada jia kano-kano ka jingjia ka bym sngewtynnad ha lynti.
Ka KSU ka la buh jingkylli ruh ïa ki bor ba pyntreikam ïa ki aiñ, ba kumno hapdeng ka jingkhang ïaid kali, ki kali kit masi pat ki poi thik-thik sha Pynursla.
Ki la don ki jingkynthoh ba ïa ki Ambulance ne ki kali kit nongpang ka dang artatien ban pyllait, hynrei ki kali masi pat kim salia bad leh donbor.
Napdeng kine ki kali kit masi, kawei ka trok ka dei kiba don ïa u Registration Nombar ML 05 G 7868, katba kawei pat ym shym la ïoh satia ïa ka Registration Nombar bad ka Super Carry kaba don ïa u Registration Nombar ML 05 U 7669.
