Khliehriat, Jylliew 07
Ha ka sienjam kaba kongsan kaba thmu ban pynroi ha kaba ïadei bad ki surok bad pynbha ïa ki lad pynïasoh hapdeng ki jylla, ka MLA ka Sutnga-Saipung ka Kong Santa Mary Shylla ha ka 5 tarik Jylliew ka la pynlong ka jingleit jurip ïa ki jaka ha ka thaiñ Sumer da ka jingthmu ban tyrwa ïa ka projek surok bathymmai ka ban pynïasoh ïa ka East Jaiñtia Hills bad ka Assam na kane ka thaiñ lyngba ka wah Kupli.
La pynlong ïa kane ka jingleit jurip ban bishar bniah ïa ki jaka jong ka thaiñ kiba biang ban shna ïa kane ka surok thymmai ka ban pynïasoh ïa ka East Jaiñtia Hills bad ka Assam lyngba ka thaiñ Sumer.
Ha kane ka jingleit jurip la synran lang ïa ka MLA da u Executive Engineer ka tnad Public Works Department (PWD), EJH, u Bah G. Langstang nalor kiwei pat ki ophisar ha ryngkat ki Rangbah Shnong na Sutnga-Saipung bad ka thaiñ Sumer.
Haba ai jingkren sha ki lad pathai khubor ha kane ka jingleit jurip, ka Kong Santa Mary ka la ong ba ka la pynlong ïa kane ka jingleit jurip khnang ban ithuh ïa ki jaka kiba biang tam bad ban bishar bniah kino ki bynta jong ka thaiñ kiba lah ban shna ïa kane ka surok thymmai kaba lah ban pynïasoh ïa ka East Jaiñtia Hills bad ka Assam lyngba ka thaiñ Sumer.
Ka la ong ruh ba kane ka jingthmu ka long ban pynbha ïa ki lad pynïasoh, ban pynsuk ïa ka leit ka wan jong ki briew bad ki mar ki mata bad ban kyntiew ïa ka ïoh ka kot bad ka roi ka par hapoh ka thaiñ.
Nalor kata, ka pyntip ruh ba ka jingthmu ban tyrwa ïa kane ka projek surok kan donkam halor ka jingtei ïa ka jingkieng lyngba ka wah Kupli ban pynïasoh beit beit lyngba ka surok bad ka Assam.
Ha kane ka jingleit jurip kaba baroh shi sngi, ka MLA ka la ïoh ruh ban ïamir jingmut lang bad ki Rangbah Shnong ha ka thaiñ Sumer khnang ban ithuh ïa ki jaka kiba biang tam na ka bynta ban pyntrei ïa kane ka projek bad ban pynthikna ban pynsuk ïa ka leit ka wan bad ka kit ka bah.
