Jowai, Jylliew 07
U Myntri ka tnad ka koit ka khiah ka jylla u Bah Wailadmiki Shylla ha ka 6 tarik Jylliew u la pynlong ka jingleit jurip ïa ka Ummulong CHC hadien ba la pynbna ban kyntiew kyrdan noh ïa ka Community Health Centre sha ka Hospital, ha kaba la antad ba ka jingmang pisa na ka bynta kane kan kot sha ka T.53 klur.
Ha kane ka jingleit jurip la synran lang ïa u Myntri da u Medical officer in-charge ka Ummulong CHC ha ka jingïadon lang ki ophisar na ka Health Engineering Wing, ki Rangbah Shnong bad kiwei kiwei.
Haba kren sha ki lad pathai khubor, u Myntri u la ong ba ka jingthmu jong kane ka jingleit jurip ka long ban bishar bniah ïa ki jinglong jingman jong kane ka jaka bad ban pynlong ïa ki jingïakren na ka bynta ban pynkhreh ïa ka Detailed Project Report (DPR), khnang ba yn lah ban sdang noh kloi ïa ka jingkhot tender.
U la pynpaw ruh ïa ka jingangnud ban ïoh ban sdang noh kham kloi ïa ka jingtei khnang ba kan long ka jingmyntoi kaba khraw na ka bynta ki paidbah ka thaiñ.
Kane ka hospital ba la kyntiew kyrdan kan ai ka jingshakri ïa kiba bun bah ki shnong kiba hap hapoh Thadlaskein bad Namdong C&RD Block.
