Shillong Jylliew 07
Ki nongïalam barim ka Khasi Students Union (KSU) kiba la shongthait na ka seng, kila ai mynsiem ïa ki nongialam ba thymmai jong ka seng kiban shim bad kit ïa ka lyngkor jong ka ri bad ka Jaibynriew.
Haba kren ha kane ka sngi u President barim ka KSU u bah Lambokstar Marngar ula iathuh ba la 28 tylli ki snem ula rung sha kane ka skulbah ka jaidbynriew kata naduh ka rta kaba 14 snem.
U Bah Lambokstar u la ong, “Naduh ka rta ba 14 snem nga la rung sha ka KSU. Ka KSU kam dei ba ka wad ïanga hynrei nga wad manga ia ka KSU bad nga dei u briew ba lehrain beij bha. Hynrei lyngba ka jingai buit ai bor u Blei bad ki kmie ki kpa, nga la ioh mynsiem ha ka seng.”
U la ai mynsiem ia ki nongïalam ba thymmai ba kidei ban kynmaw ba ka ïing Byndi kadei ka skulbah jong uwei pa uwei u dkhot ka KSU na bynta ban len lade ia ka pateng ba mynta ban ai ka jingshngain ia ka ri baroh kawei.
Kum u nongïalam barim ka KSU la kyntu ia ki nongialam ba thymmai ba kim dei ban sngap ia ki jingshah kynthoh bad kim dei ban sngewrem bad kim dei ban sngewsarong bad kum ki nongialam kidei ban long kiba shlur, long shipara bad ban ieng skhem ha ka nongrim bad ym dei ban shah thied lano lano ruh.
U la bynrap ba ha ki 9 snem ha ka seng, ki wan shibun ki jingtynjuh bapher bapher, hynrei kum ka seng pat kam pat ju iapein ia ki ishu jong ka jaidbynriew.
“Nga shongthait manga na ka KSU hynrei ka KSU kan ym shongthait nanga lano lano ruh. Ka khyllipmat ba ka KSU kan shongthait na nga kadei ka sngi ba shim noh U Blei,” u la ong.
Katba na ka liang u General Secretary barim ka Khasi Students Union (KSU) u samla Donald V Thabah ula ong ba ka jingiaid lynti kum ka KSU ula mad shibun ki jingeh bad u la ioh ruh ia shibun ka jinghikai lyngba ka jingbtin lynti ka seng.
U la ai mynsiem ia ki nongïalam ba thymmai ba kidei ban long kiba trei shitom ban kit ïa ka lyngkor jong ka ri bad ka jaidbynriew.
