Shillong, Jylliew 07
U MLA ka UDP na Mawsynram Bah Olan Sing Suin u la kyntait ïa ka jingïakren ba ka don ka jingïapait hapoh ka United Democratic Party (UDP), da kaba kam ba ka seng ka long tylli kawei ha baroh ki mat kiba ka shim.
Haba kynthoh halor ki jingdon jong ka jingmih bad rung ha ki seng saiñpyrthei, u Bah Suin u la ong ba kum kine ki jingkhih ki dei kiba ju don beit hapoh ka kam sain pyrthei.
“Kane kam dei satia kaei kaei kaba phylla, ka long kaba ju sakhi manla ka por. Ha kino kino ki seng saiñpyrthei, ki don kiba mih bad ki don kiba rung,” u la ong.
U la ban ba ka UDP kam don satia ïa kano kano ka jingkhih ne ïapait hapoh bad ka treikam da kaba ïamynjur lang ryngkat.
“Kam don satia ka jingïapait. Baroh ngi long kawei bad ngi rai lang halor kino kino ki mat. Ngi long tylli kawei, kumba ka kyrteng jong ka seng ka pynpaw,” la ong u MLA.
U Bah Suin u la pynshai ruh halor ka kam ba dang shen ba ïadei bad ka jingjied kyrtong Rajya Sabha, da kaba ong ba ïa kane ka rai la shim da ka Parliamentary Party, ym da ka seng baroh kawei.
U la bynrap ruh ba u kyrtong uba la shah jied um dei satia uba mihkhmat ïa kano kano ka seng saiñpyrthei hynrei ïa ka Meghalaya Democratic Alliance.
“Kane ka dei ka rai kaba la mih na ka jingïalang jong ka Parliamentary Party ka UDP, kam dei ka rai jong ka seng. Kane kam dei ka ilekshon, ka dei tang ka jingjied ban phah sha Rajya Sabha. Um dei satia u kyrtong jong kano kano ka seng saiñpyrthei, u dei u kyrtong jong ka MDA,” u la batai.
Haba phai shakhmat, u Bah Suin u la ong ba ka UDP mynta ka dang phai khmat na ka bynta ban pynïar shuh shuh ïa kane ka seng naduh madan.
“Ngi la sdang pynkhlaiñ ïa ka seng naduh na tynrai. Ha ki sngi bad ki taïew ki ban wan, ngin sa pynlong ïa ki jingïalang bad wanrah ïa ki lad ki lynti bad ki buit treikam kumno ban pynkhlaiñ ïa ka seng naduh tynrai, ha ki konstitwensi, ki district bad ha ka jylla hi,” u la ong.
