Shillong, Jylliew 07
U MLA ka United Democratic Party (UDP) na Mawsynram Konstitwensi, u Bah Olan Sing Suin u la ong ba ka Jylla Meghalaya ka la pynkhreh ban sdang treikam biang ha ki jaka khappud, kiba don ha khappud ka India bad ka Bangladesh, hynrei ka jingplie biang ka shong ha ka jingmynjur na ka ri Bangladesh.
Haba kren halor ka jingkhaii ha ki khappud kaba la sahkut, u Bah Olan u la ban jur, ba baroh arliang kidei ban ïa mynjur lang shuwa ba ki haat kin treikam biang.
“Na ka liang jong ngi, ngi long kiba kloi ban plie ïa ki khappud, hynrei ka shong ha ka Bangladesh namar ba ki la kyntait bad kim long kiba kloi ban plie ïa ki khappud, baroh ar ka Meghalaya bad Bangladesh, kidei ban long kiba la khreh ban plie ïa ki, tang kumta ngin lah ban plie ïa ki khappud. Lym kumta, kam lah tang na kawei ka liang hynrei ka donkam ïa ka jingmynjur jong ka Mehalaya bad Bangladesh,” u la ong.
U Bah Olan Sing Suin u la pynpaw ïa ka jingktah ha ka liang ka ïoh ka kot jong ki Haat ha ki nongshong shnong, da kaba kdew ba ka Konstitwensi jong u, ka ïasam ïa u pud u sam bad ka Bangladesh bad ka don ar tylli ki Haat kiba treikam.
“Ha kaba ngi ïasam khappud bad ka Bangladesh, ngi don ar tylli ki jaka khappud ha ka Konstitwensi jong nga. Haba ki jaka khappud ki treikam, wat ki nongkhaii rit bad ki nongkhaii heh ruh ki ïoh kamai bha. Ki die mar ha ki jaka khappud bad ki thied ïa ki mar nangtei ban die ha ka jylla jong ngi. Ki jaka khappud ki ai kamai ban kyrshan ïa ka ïing ka sem jong ki bad ïarap ïa ki ban im,” la ong u Bah Olan.
U MLA u la ong, ba u la dep ban rah ïa kane ka kam sha ka Sorkar Jylla bad kyntu ban buddien kham kloi bad ka Sorkar Pdeng.
“Hooid, nga la dep ban buddien ïa kane ka kam bad u Myntri Rangbah ka Jylla, bad ka dei ka kamram jong u Myntri Rangbah ka Jylla, ban rah sha ka Sorkar Pdeng khnang ba yn lah ban pynbeit kloi ïa kane ka kam”, la ong u Bah Olan Sing Suin.
U la bynrap ruh, ba katba ka Meghalaya ka la pynkhih ïa katei ka mat, hynrei kam shym la don kano-kano ka jingkynthoh na ka liang ka Bangladesh haduh mynta.
“Hooid, u Myntri Rangbah ka Jylla u la dep buddien ïa kane ka kam. Na ka liang ka Bangladesh pat ka dang sngap jar haduh mynta. Kumta, ngi dang ap ïa kaba bha tam ban wan”, u la ong.
