Shillong, Jylliew 07
U James K Sangma uba dei u kyrtong ba la pynïeng da ka Meghalaya Democratic Alliance-2 kaba dei ka sorkar synrop ba la lamkhmat da ka NPP ba la kyrshan da ka UDP, HSPDP, BJP bad MLA shimet un leit ban thep kyrteng lashai ka sngi Nyngkong kum u kyrtong ban ïakhun ïa ka ilekshon MP Rajya Sabha.
U MP Rajya Sabha un mihkhmat tang marwei na jylla Meghalaya ïa kaba yn jied da ki 60 ngut ki MLA hynrei la sngewthuh ba ïa kane ka shuki yn jop suk da u James K Sangma u kyrtong ka sorkar MDA-2 namar ki la don lypa ka jingbun paid.
Haba u James Sangma un leit thep kyrteng lashai ha kamra jong u Secretary ka Meghalaya Legislative Assembly kaba don ha Khyndailad yn synranlang da u Myntri Rangbah ka jylla, ki MLA ka sorkar MDA.
Ka jingthep kyrteng kan kut lashai ka sngi bad ka jingpeit bniah ïa ki kot ki sla kan long ha 9 tarik Jylliew, ka jingthep vote kan long ha ka 18 tarik mynta u bnai naduh 9:00 baje mynstep haduh 4:00 baje janmiet bad yn ñiew ïa ki vote ha ka por 5:00 baje janmiet.
Ka jingmih bujli u James K Sangma uba dei u hynmen jong u Conrad K Sangma uba dei u Myntri Rangbah ka jylla ka dei hadien ka jingkut noh ka samoi treikam jong u Dr WR Kharlukhi.
U James K Sangma u dei u MLA barim ka Dadenggre constituency hynrei u la shah rem noh ha ka ilekshon MLA ha u snem 2023.
