Shillong, Jylliew 07
U Secretary ki Khlieh Nongsynshar Hima Sohra u Bah BV Rymmai u la ong ba ki khlieh nongsynshar ki la pynkhreh ban leit ïakynduh ïa u Lat ka jylla u Chandrashekhar H. Vijayashankar ban phah tuklar ïa ka kam thung Syiem hapoh ka Hima Sohra.
Haba ïakren bad u Bah BV Rymmai u la ong ba ki Khlieh Nongsynshar Hima Sohra ki dawa beit ba ka Khasi Hills Autonomous District Council (KHADC) kan ai Sanad ïa u Maremdor Syiem ba un shimti ïa ka khet Syiem ka Hima Sohra kumba la dep jied.
U la ïathuh ba ki khlieh nongsynshar kin pyrshang ban ïakynduh ïa u Lat ka jylla kum u khliehduh ka jylla ba un tuklar ïa kane ka kam thung Syiem ha Hima Sohra.
U la ïathuh ruh ba ka KHADC ka la shu pynbna tang ha ki lad pathai khubor ban pynlong ilekshon ban jied Syiem ha Hima Sohra hynrei haduh mynta kim pat ïoh da ka jingthoh.
Kumban shu pynkynmaw kane ka jingjied Syiem ha Hima Sohra kam pat kut haduh mynta namar ka KHADC ka la thung acting chief da u Mynjurlang Majaw katba ki khlieh nongsynshar ki la dep pynskhem ïa u Maremdor Syiem uba dei u Syiem Khynnah ba un kiew sha ka khet kum u Syiem ka Hima Sohra hynrei haduh mynta ka KHADC ka khlem pat ai Sanad.
Kum ban shu pynkynmaw u CEM ka KHADC u la ong ha kine ki sngi ba la bthah ïa u Acting Chief ba un pynkhreh ïa ki nongthep vote ïa ki jingdonkam baroh hashwa ban buh ïa ka sngi thep vote ban jied ïa u Syiem ba pura.
