Nongstoiñ, Jylliew 07
Shibynta ban kyrshan ïa ki riew tymmen bad ïa ki briew kiba don ka jingduna ha ki dkhot met u MLA ka Nongstoiñ Bah Gabriel Wahlang ha ryngkat ka National People’s Party (NPP) Nongstoiñ Block ha ka sngi Saitjaiñ jong ka taïew kala pynlong ïa ka prokram pynkup burom bad noh synñiang da ka song pisa ïa ki briew kiba don jingduna ha ki dkhot met bad ki tymmen kiba la 80 snem shaneng.
Ïa kane ka jingïalang pynkup burom la pynlong ha Bishop Hall New Nongstoiñ bad ka phang pdeng jong kane ka prokram ka long kyrpang ïa ki briew kiba don jingduna ha ki dkhot met bad ïa ki rangbah bad ki longkmie kiba la kynjoh sha ka 80 snem ka rta shaneng na Nongstoiñ constituency.
Ha kane ka sngi nalor u MLA Bah Gabriel Wahlang, la donlang ruh ki nongïalam ka NPP Nongstoiñ Block, ki riew rangbah, ki longkmie longkpa, kiba ai ruh ïa ki jingkren halor ka jingdonkam ban ïatylli bad ka jingshakri paidbah bad ka jingïatreilang khlem da thew seng ban nang ïai kyntiew iwei ïa iwei pat.
U Bah Gabriel Wahlang haba kren ha ka jingïalang u la ong, ki rangbah, ki tymmen bad ki briew kiba don jingduna ha ki dkhot met ki dei kiba don ka hok ba kin ïoh ïa ka burom bad ka jingïarap na ka imlang ka sahlang.
Shuh shuh u la ong ruh, “Kane ka jingleh ka jong nga kam dei ka jingleh politik, kam dei ka jingkwah vote lane ba phin vote ïa nga namar ka jingleh bha hynrei ka dei ka mynsiem kaba ngi sngew ban ïa don bynta lang, kam dei ba ngi wan hangne ba ngin ïalap ilekshon ba don ka ilekshon”.
U la ong ruh ba kin sa don kiba kynthoh ba wan ïalap ilekshon namar kane ka pyrthei kaba mynta ka don tang ka jingïakynthoh ïa kaei kaba ngi thmu ban leh na ka bynta u paidbah hynrei “Nga kwah ban ong ba kane ka dei mynsiem tang ban shakri”.
U Bah Gabriel u la pyntip ruh ba kito ki bym shym la ïoh mynta la ki dei kiba duna ha ki dkhot met la ki dei kiba 80 snem ka rta wat khuslai kin sa ïoh.
