Shillong, Jylliew 07
U MLA ka Mawsynram constituency Bah Olan Sing Suin u la ong yn pynïasoh ïa ka Mawsynram bad ka Sohra lyngba ka surok thymmai bad ka jingkieng halor ka wah Umiam ban kyntiew ïa ka kam jngohkai pyrthei ha kane ka thaiñ.
Haba kren ha ka sngi Saitjaiñ, u MLA ka Mawsynram u la ong ba ki kam pynroi ha kylleng ka thaiñ ki nang kiew stet bad kan pynduna ïa ka por ban ïaid lynti ba jngai ban khring shuh shuh ïa ki nongwan jngohkai sha baroh ar tylli ki jaka.
Halor ki projek surok kiba dang ïaid shakhmat, u Bah Suin u la ong ba ar tylli ki kam kiba kongsan ki dang ïaid shakhmat hapoh ka jingïarap pisa jong ka World Bank kata ka surok na Phlangwanbroi sha Ranikor kaba la sdang shna.
U la ong ba ïa ka surok na Welloi haduh Phlangwanbroi mynta ka dang don ha ka jingkhot tender, bad la khmih lynti ba ïa kane ka kam yn pyndep ha u bnai Jylliew kaba la buh thong ban pyndep ïa kane ka surok ha kine ki ar snem.
“Ynda la dep shna ïa kine ki surok, nga ngeit skhem ba ka jingwan jngohkai pyrthei kan nang kiew, ka jinglong jingman jong ki surok ka don ka bynta kaba khraw ha ka jingwan ki nongjngohkai pyrthei. Da ka jingïadei kaba bha, ngi khmih lynti ba kin nang bun ki nongjngohkai pyrthei bad ka jingroi kaba stet na ka bynta ka kam jngohkai pyrthei ha ka thaiñ,” ong u Bah Suin.
U Bah Suin u la ïathuh ba dang shen u la ïakynduh ïa u Symbud Myntri Rangbah ka jylla u Bah Prestone Tynsong ban tyrwa ïa ka surok kaba beit beit hapdeng ka Mawsynram bad Sohra lyngba ka surok Dewsaw sha Nongwar, ban pynduh noh ïa ka jingïaid lynti kaba jngai bad kyllain na bynta kiba sah hapdeng kine ki ar tylli ki thaiñ.
“Ka rain museum ha Mawsynram ka dang ïaid shait shait ha ka jingshna, nangta ka Mawsynram bad ka Sohra ka dei ban pynïasoh beit ban suk ka leit ka wan ki paidbah,” u la ong.
U la pyntip ba ka jingtrei ïa ka surok ka la ïaid baroh ar liang bad ka jingkieng kaba ïaid lyngba ïa ka wah Umiam kan pyndep noh shen ban pynïasoh.
“Naduh Dewsaw sharum ka wah Umiam, ka surok ka dang ïaid shakhmat, na ka liang Sohra, na Nongwar sha Phali kata ka surok ruh ka dang ïaid shaphrang, baroh ar tylli ki surok ki poi sha rud wah bad lah ban pynïasoh da ka jingkieng, shisien ba la shna ïa ka jingkieng yn sa shna beit beit ïa ka shnong Mawsynram bad ka shnong Sohra”, la ong.
U Bah Suin u la ong ba ka jingpynïasoh kaba thymmai ka lah ban thaw ïa ka jingleit jngohkai pyrthei kaba pynïasoh lang kaba kynthup ïa ki krem jong ka Sohra bad ki jingkieng tynrai kiba im bad ka jaka buh jingthoh sahnam jong u slap jong ka Mawsynram.
